DILI, 03 fevereiru 2023 (TATOLI)–Prezidente Repúblika (PR), José Ramos Horta, sesta ne’e, konvida hodi hala’o konsulta hodi rona Partidu Congresso Nacional de Reconstrução Timorense (CNRT) molok dekreta loron eleisaun Parlamentár 2023.
Notísia Relevante: Governu apoia desizaun PR Horta hodi dekreta loron Eleisaun Parlamentár
Prezidente Partidu CNRT, Kay Rala Xanana Gusmão, hateten CNRT preparadu atu hasoru no compete iha eleisaun parlamentár 2023 bainhira Prezidente Repúblika, José Ramos Horta, dekreta kalendáriu eleisaun.
“CNRT preparadu atu kompete hasoru eleisaun parlamentár, bainhira PR dekreta ona kalendáriu eleisaun. Ami lao ba-mai kolen atu mate ne’e, ami la prepara an ka,” Prezidente Partidu CNRT, Xanana Gusmão, hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite.
Entretantu, prezidente Partidu CNRT ne’e hateten CNRT laiha koligasaun pre-eleitorál, nune’e povu hili tiha ba mak sira-nia partes ei haree kestaun ne’e.
Prezidente Repúblika iha kalendáriu ida hala’o audiénsia ba partidu sira ho insituisaun sira seluk, ne’ebé ohin lokra’ik ne’e bolu partidu CNRT nia estrutura másima iha partidu laran mak Komisaun Polítika Nasionál ne’ebé mai hotu reprezenta partidu.
“Ami mai ko’alia kona-ba data atu marka loron eleisaun Parlamentár ne’ebé ami hato’o ami-nia hanoin no Prezidente mós ko’alia kona-ba ida-ne’e. hodi haree ba situasaun sira hotu,” Xanana hateten.
Tanba ne’e, partidu CNRT halo apelu ida ba Prezidente Repúblika katak tuir siklu eleitorál tinan lima-lima, ne’ebé se iha 2018 eleisaun hala’o iha maiu, siklu eleitorál ne’e iha maiu 2023 tenke hala’o eleisaun.
“Ami mós rona imi jornál sira fó sai hotu no membru Governu balun ko’alia kona-ba bele iha setembru no iha ne’eba ne’e mak ami hodi hatudu katak Komisaun Nasionál Polítika partidu nian ami halo diskusaun iha ami nia sede, hodi haree karik ema sira-ne’e iha razaun atu temi tenke adia ka nusa,” nia hateten.
Xanana hateten, laiha razaun atu adia eleisaun lejislativa tanba iha konstituisaun RDTL ne’e hateten katak mandatu ne’e tinan lima.
“Tanba ne’e, Prezidente rona tiha ami-nia opiniaun, agora hein de’it Preziente atu bainhira mak marka ka dekreta kalendáriu eleisaun,” nia dehan.
Notísia Relevante: Previzaun data Eleisaun Parlamentár sei hala’o iha 06 ka 12 maiu
Jornalista : Nelson de Sousa
Editór : Cancio Ximenes
