DILI, 08 fevereiru 2023 (TATOLI)—Atuál Embaixadór Timor-Leste (TL) ba Béljika, Jorge Trindade Camões, kuarta ne’e, asina termu pose ba Embaixadór no simu karta kredensiál hosi Prezidente Repúblika asume tan kargu nu’udar Embaxadór Timor-Leste ba nasaun haat.
Notísia Relevante: PR husu Embaixadór dezignadu reprezenta Estadu Timor-Leste ho dignidade
“Ohin, mai hasoru malu ho Xefe Estadu atualiza serbisu iha rai-li’ur liu-liu Béljika Uniaun Europeia (UE). Nune’e mós simu tan responsabilidade foun atu reprezenta Timor-Leste iha Beljia, maibé akredita mós ba Fransa, Alemaña, Polónia no Luxemburg,” Embaixadór Jorge Trindade Camões hateten ba jornalista sira hafoin ramata enkontru ho Prezidente Repúblika (PR), José Ramos Horta, iha Palásiu Prezidensiál Nicolau Lobato, Bairru Pite.
Embaixadór ne’e la hela iha nasaun lima refere maibé iha momentu balun mak ba vizita tanba nasaun sira-ne’e jeografikamente hela besik malu.
Diplomata timoroan ne’e sei buka hametin relasaun ho nasaun sira-ne’e no esplora área promosaun investimentu lori investór mai rai-laran, ho kapasitasaun rekursu umanu óinsa hetan eskola ka hetan formasaun ruma iha ne’eba.
Embaxadór Jorge Trindade Camões aproveita tempu badak iha Timor-Leste, sei ko’alia ho liña ministeriál relevante atu haree saida mak presiza atu halo depende nesésidade bele aumenta ka diminui.
Durante enkontru, Xefe Estadu husu Embaixadór Jorge Trindade Camões kontinua hala’o serbisu ho di’ak no koordena ho Governu sentrál atu haree área saida mak esplora, nune’e halo hamutuk ho nasaun sira-ne’ebé akredita ba.
Jornalista : Nelson de Sousa
Editór : Cancio Ximenes
