Autoridade finaliza ona reabilitasaun sede suku Buruma
BAUCAU, 28 marsu 2023 (TATOLI) – Autoridade suku finaliza ona programa Reabilitasaun Sede Suku (RSS) iha suku Buruma liuhosi orsamentu Programa Nasionál Dezenvolvimentu Suku (PNDS).
Xefe suku Buruma, Libório dos Santos Freitas, esplika, prosesu reabilitasaun sede suku finaliza iha tinan-2022 no oras ne’e utiliza ba prosesu atendimentu administrasaun komunidade suku Buruma.
“Fatin ne’e sufisiente ona ba ami atu halo serbisu, mesmu modelu uma ne’e la refleta ba edifísiu nu’udar sede suku maibe natoon ona atu halo atendimentu ba komunidade,” Xefe suku Buruma informa ba Agência TATOLI iha sede suku, tersa ne’e.
Prosesu reabilitasaun hahú iha fulan-jullu no remata iha fulan-novembru tinan-2022 ho tótal orsamentu rihun $13-resin ne’ebé hadia item hanesan kalen, arus janela no odamatan, pinta inklui aumenta varanda ida no aumenta sinta jerál.
Sede suku refere durante tinan barak hetan estragu tanba konstrui dezde okupasaun Indonézia nune’e difikulta atendimentu komunidade bainhira iha tempu udan.
Nune’e liuhosi reuniaun konsellu suku bazea ba orsamentu alokadu, autoridade suku deside reabilita sede suku ne’ebé presiza hadi’a nune’e fasilita prosesu atendimentu ba komunidade.
Autoridade suku Buruma husu ba governu futuru bele aumenta tán fatin enkontru tanba la sufisiente atu akumula ema barak.
Suku Buruma komposta hosi aldeia haat hanesan Tasi, Casmuto, Ono-sere no Soli-ua ho totál populasaun hamutuk 3.639.
Jornalista : Natalino Belo
Editór : Evaristo Soares Martins
