Maioria komunidade Buruma asesu ona bee-moos
BAUCAU, 28 marsu 2023 (TATOLI) – Maioria komunidade iha suku Buruma, postu administrativu Baucau Vila, munisípiu Baucau, asesu ona bee-moos liuhosi Programa Nasionál Dezenvolvimentu Suku (PNDS).
Xefe suku Buruma, Libório dos Santos Freitas, esplika, hosi totál komunidade iha Buruma asesu bee-mos tanba durante autoridade suku foka liubá programa kanalizasaun bee-moos ba kada aldeia liuhosi programa PNDS regulár no Projetu Reabilitasaun no Reabilitasaun (RKRE).
“Iha uma to’os no uma-kain balun mak seidauk asesu bee-moos tanba hela dook hosi kanu maibé maioria komunidade ne’ebé hela uma rezidénsia iha Buruma asesu ona bee-moos liuhosi programa PNDS,” Xefe suku Buruma informa ba Agência TATOLI iha Buruma, tersa ne’e.
Autoridade suku tinan-2022 deside liuhos orsamentu RKRE hodi implementa programa kanalizasaun bee-moos ba komunidade iha aldeia Ono-sere ho totál orsamentu hamutuk rihun $30-resin hodi finaliza kanalizasaun bee-moos ba komunidade iha Buruma.
“Ita akumula mós komunidade aldeia tasi ne’ebé hela besik programa alvu atu benefísia hotu komunidade hotu suku Buruma nian,” Libório Freitas akresenta.
Maske nune’e sei iha komunidade besik uma 20-resin mak seidauk asesu bee-mos tanba hela dook hosi kanál kanu no uma sira-ne’e maioria nu’udar uma to’os ka fatin hakiak animál.
Uma hirak-ne’e distánsia dook no presiza orsamentu barak tanba uma-ida dalaruma purvolta kilomótru rua-resin nune’e la prienxe kritéria atu dada bee-moos.
Liuhosi orsamentu PNDS tinan-2023 autoridade suku sei aloka tán orsamentu atu halo manutensaun ba kanál bee-moos ne’ebé hetan estragu.
Suku Buruma komposta hosi aldeia haat hanesan Tasi, Casmuto, Ono-sere no Soli-ua ho totál populasaun hamutuk 3.639.
Jornalista : Natalino Belo
Editór : Evaristo Soares Martins
