SEJD ezekuta ona OJE 2023 ho pursentu 13
DILI, 04 abríl 2023 (TATOLI) – Diretór Administrasaun no Finansa, Sekretáriu Estadu Juventude no Desportu (SEJD) Guido Monteiro, informa SEJD ezekuta ona Orsamentu Jerál Estadu (OJE) 2023, ho pursentu 13%.
“Ezekusaun orsamentu SEJD nian iha tinan ida ne’e foin mak atinje 13%, hosi pursentu ne’e ezekusaun atual 8%, iha obligasaun 3%, komitmentu iha 0,05% ho sira ne’e hotu mak nia totál 13%, hahú janeiru-marsu”, Diretór dehan ba Agência TATOLI iha edifísiu SEJD, ohin.
Nia dehan, SEJD foin ezekuta ho pursentu kiik tanba iha trimestre primeiru, programa hotu tuir kalendarizasaun SEJD nian tuir planu. Hahú segundu trimestre mak foin avansa makas iha ezekusaun.
“Primeiru trimestre halo ezekusaun maibé tarde tanba iha mudansa estrutura orgánika SEJD nian ne’ebé aprova iha tinan kotuk entaun orsamentu mós aprova tuir ida ne’e, entaun tenke halo ajustamentu ho nune’e ezekusaun la’o los ne’e iha fulan marsu nia-laran”, nia esplika.
Hosi pursentu ne’ebé iha, envolve hosi kategóriu hotu ne’ebé aloka iha SEJD hosi saláriu vensimentu, transferénsia públika no seluk tan.
OJE ne’ebé aprova iha Parlamentu Nasionál, destina ba SEJD hamutuk $5.102.489 ho nia programa 510, boa Governasaun no jestaun institusionál $1.803.723 no programa 980 igualdade jéneru no inkluzaun sosiál $3.298.766.
Jornalista: Hortencio Sanchez
Editór : Zezito Silva
