DILI, 12 abríl 2023 (TATOLI)—Governu liuhosi Ministériu Administrasaun Estatál (MAE), tersa ne’e, inaugura edifísu administratdór postu administrativu Ainaro, munisípiu Ainaro.
Ministru Administrasaun Estatál, Miguel Pereira de Carvalho, hateten, edifísiu foun ne’e ninia funsaun prinsipál mak atu halo atendimentu ba iha públiku no mós ba populasaun sira liu-liu iha postu administrativu Ainaro ne’e rasik.
“Administrativa ida-ne’ebé kiik liu no besik ba ita nia populasaun sira-ne’ebé ita aposta servisu sira iha ne’ebá ho objetivu atu bele hadi’ak prestasaun servisu públiku ba ita-nia komunidade sira,” Ministru Miguel hateten liuhosi komunikadu imprensa ne’ebé Agência Tatoli asesu, kuarta ne’e.
Tanba ne’e, nia dehan, ohin loron ne’e eziste de’it funsionáriu administrasaun lokál Estadu no la eziste funsionariu ministériu sira-nian iha munisipiu ida.
“Administradór Ainaro, Administradór Postu, Xefe suku sira, dirijente sira, ohin loron ita-nia administrasaun públika ne’e organizadu iha forma ida-ne’ebé mak eziste administrasaun sentrál no mós iha adminsitrasaun lokál Estadu. Administrador Munisípiu mak nu’udar reprezentante Governu sentrál iha munisípiu, atu bele prezide servisu públiku sira hotu iha munisípiu sira, presiza deskonsentradu ba iha munisípiu no mós postu administrativu sira nu’udar extensaun ida ba iha servisu adminsitrasaun Munisipá, hodi hala’o servisu públiku sira ba ita-nia populasaun sira,” nia dehan.
Governante ne’e hatutan servisu públiku oioin ne’ebé ohin loron deskonsentra ba iha munisípiu sira iha área saúde, edukasaun, agrikultura, obras públika, transporte, asaun sosiál, protesaun sívil no mós seluk seluk tan.
Nune’e, MAE husu ba administradór postu administrativu no mós funsionáriu sira hotu ne’ebé mak servisu iha edifísiu ida-ne’e, atu atende populasaun sira ho didi’ak mamar ho hamnasa, atu nune’e populasaun sira haree katak iha duni relasaun sevisu ida-ne’ebé di’ak entre komunidade ho funsionáriu sira.
Jornalista : Osória Marques
Editór : Cancio Ximenes
