AINARO, 19 de abril, (TATOLI) – Partido Democrata Cristão (PDC) aprezenta programa prioritáriu sira ba apoiante no militante sira iha suku Nunumoge, postu administrativu Hato-builico, munisípiu Ainaro.
Prezidente PDC, Francisco de Aráujo, hatete partidu ne’e sei prioritiza liu setór produtivu haat hanesan Agrikultura, Saude, Infrastrutura, Edukasaun. Koloka Orsamentu 12-15 pursentu kada tinan ba setór hat ne’e.
Dirijente ne’e promete sei apoia inisiativa juventude sira haki’ak ikan iha fatin potensiál sira iha Ermera, Aileu, Baucau, Ainaro, Suai no Maliana.
“Iha ekonomia nian, ami sei foka liu ba modernizasaun setór agrikultura. Oinsá uza tekonolojia moderna hodi fasilita kuda no kolleta lalais. Ita sei hadia fatin turizmu sira, tanba Timor-Leste poténsia ba dezenvolvimentu turizmu, maibe sítiu turístiku barak mak abandonadu, tanba ne’e PDC hakarak dezenvolve setór ne’e hodi diversifika ekonomia atu nune’e nasaun labele depende de’it ba Fundu Petrolíferu”, informa Francisco de Aráujo ba ajénsia TATOLI via telemóvel.
Francisco de Aráujo akresenta katak iha setór sosiál, PDC prefere moderniza infarestrutura saúde nomos edukasaun.
Tuis Prezidente PDC, tenki hanoin ona harii ospitál nasionál ho andar lima ne’ebé kompletu ho ekipamentu médiku atu bele halo tratamentu médiku ba povu. Infrastrutura tenki akumula ho rekursu umanu, mobiliáriu, transporte. Wainhira konstrui postu saúde ida, tenki kompleta residénsia ba médiku, moru protesaun no veikulu sira hodi transporta pasiente.
“PDC hakarak halo mudansa ba infraestrutura saúde no estabelese laboratóriu, rekruta espesialista sira atu halo atendimentu ba pasiente nune’e bele hamenus despeza orsamentu haruka pasiente ba estranjeiru”, nia informa.
Kestiona kona-ba investimentu iha setór edukasaun, Francisco de Araújo promete, PDC sei loke ensinu pré-eskolar iha kada eskola hotu ne’ebé agora dadaun existi, finansia eskola tékniku vokasionál hotu atu jere rasik fundus eskola nian, hadi’ak kualidade eskola públika hotu iha rai laran, instala sistema telekomunikasaun no informátika iha kada eskola, aumenta númeru profesór permanente hodi asegura 25 too 35 estudante kada aula, loke eskola espesiál ba ema ho defisiénsia sira, apoiu sentru formasaun sira, loke UNTL iha kada rejiaun hanesan Baucau, Ainaro, Maliana no RAEOA hodi hamenus númeru deslokasaun husi munisipiu mai iha Dili.
“Eskola hotu presija iha biblioteka no laboratóriu, hamenus númeru estudante iha kada sala de aula másimu ne’e ema 30 atu nune’e bele garante edukasaun ida ne’ebé kualidade no sei halo rekrutamentu ba profesór sira, tanba durante ne’e barak mak servisu voluntáriu no la hetan atensaun husi Governu”, nia kompromete.
Jornalista: Afonso do Rosário
Editora: Isaura Lemos de Deus
