iklan

AINARO

FONGTIL: Povu laiha antuziazmu hodi tuir kampaña eleitorál

FONGTIL: Povu laiha antuziazmu hodi tuir kampaña eleitorál

Diretór FONGTIL, Valentil da Costa Pinto. Imajen Tatoli/Francisco Sony

AINARO, 22 abríl 2023 (TATOLI) – Fórum Organizasaun Naun-Governamentál (FONGTIL) konsidera katak, desde abertura kampaña Eleisaun Parlamentár (ElPar) 2023, iha loron 19 abril, povu laiha antuziazmu hodi partisipa iha kampaña refere, kompara ho eleisaun prezidensiál tinan kotuk.

Diretór-Ezekutivu FONGTIL, Valentim da Costa Pinto, konsidera situasaun ida ne’e akontese, tanba partidu polítiku sira “promove liu figura líder partidu” kompara ho programa prioritáriu  ne’ebé sei implmenta iha tinan lima bainhira kaer ukun.

“Depois abertura kampanã loron hirak liu ba, tuir saida mak ami haree, primeiru ita seidauk akontese distúrbiu ba ordem públiku, no segundu, ami haree ambiente kampaña ne’e hanesan bai-bain de’it, dinámika ne’e ladun moris [monoton] no ladun iha antuziazmu husi ita nia sidadaun sira atu buka hatene katak ita tama ona ba tempu ida ne’ebé atu determina Estadu no nasaun nia futuru ba tinan lima ba oin”, dirijente informa ba jornalista sira, iha Ainaro Vila, sabadu ne’e.

Valentim da Costa Pinto akresenta katak, tuir observasaun, kuaze partidu polítiku sira promove liu líder sira nia figura no atributu partidu nian no la tau prioridade ba programa partidu nian  hodi bele konvense sidadun sira, inklui panfletu no atributu partidu polítiku sira iha estrada ninin ladun barak.

“Kampaña ne’ebé realiza iha fatin-fatin sira ne’e, ita ladun haree sira aprezenta programa prioridade ne’ebé sei implementa bainhira atu kaer ukun. Ida ne’e ita ladun haree, maibe fotografia iha, mas programa prioridade partidu sira nian ita ladun haree”, nia reafirma.

Dirijente ne’e observa mos katak, iha kampaña eleisaun prezidensiál ne’ebé realiza iha tinan kotuk situasaun ne’e moris oituan, tanba ema hotu-hotu kuriozu atu buka hatene kona-bá oráriu kampaña no kandidatu ida ne’ebé mak atu aprezenta nia programa.

“Movimentu sira ne’e bai-bain de’it no laiha dinamika ne’ebé atrativu. Situasaun ne’e la hanesan ho eleisaun prezidensiál”, nia haktuir.

Jornalista: Afonso do Rosário

Editora: Isaura Lemos de Deus

iklan
iklan

Leave a Reply

iklan
error: Content is protected !!