AINARO, 29 abríl 2023 (TATOLI) – Partidu Libertasaun Populár (PLP) ho númeru sorteiu 3 ne’e promete sei fó kréditu ba jovem sira ne’ebé hakarak kontinua estudu ba iha ensinu superiór.
Prezidente PLP, Taur Matan Ruak, hato’o kompromisu ne’e bainhira halo kampaña ho tipu diálogu iha Salaun Parokiál Ainaro, sábadu ohin.
“ Ita sei fó kréditu ba estudante sira no sei selu fali bainhira konklui estudu no hetan ona servisu ho objetivu atu hakmaan inan-aman sira nia todan”, Taur Matan Ruak kompromete ba militante no simpatizante sira, iha Ainaro Vila.
Tuir líder políkiu ne’e, PLP mós hakarak hametin sosiedade ka hametin unidade entre timoroan, liuhusi buka no halo’ot restu mortál sira no apoiu harii uma lulik ho orientasaun ba “turizmu kulturál”.
“Ida seluk mak hakarak hametin sosiedade, hametin timoroan sira, tanba iha tempu portugés ita fahe malu, Indonézia nia tempu ita fahe malu no 1999 mós ita fahe malu, entaun ita hakarak halo ida ne’e hodi halibur timoroan”, nia akresenta
Tuir Taur Matan Ruak afirma atu konkritiza planu ida ne’e, “dahuluk ita nia mate sira [veteranu sira] ita tenki hakoi hotu, daruak hadia ita nia uma lulik sira, tanba uluk funu ita ba simu bua ho malus no ikus ita ukun-an haluha la tau matan. Tanba ne’e ita hakarak hadia uma lulik sira ne’e atu orienta ba turizmu kulturál atu ita bele hametin ita nia relasaun”.
PLP mós defende estabelese Parseria Públiku-Privada (PPP, sigla Inglés) ho empreza privadu sira hodi investe iha setór produtivu ho objetivu diversifika ekonomia atu labele depende de’it ba Fundu Petrolíferu.
Atividade kampaña eleitorál ne’e hetan seguransa husi Polisía Nasionál Timor-Leste no observa husi Komisaun Nasionál Eleisaun (CNE-sigla portugés) no Provedoria Direitu Humanus no Justisa (PDHJ).
Notísia relevante :PLP hakarak dezenvolve uma lisan sai fatin turizmu kulturál
Jornalista: Afonso do Rosário
Editora: Isaura Lemós de Deus
