Kompañia hahú reabilita edifísiu postu administrativu Baucau
BAUCAU, 15 maiu 2023 (TATOLI) – Edifísiu postu administrativu Baucau Vila hahú hala’o reabilitasaun hosi kompañia responsável.
Administradór postu administrativu Baucau vila, Insencinio António da Silva, esplika, projetu reabilitasaun edifísiu refere parte hosi Programa Dezenvolvimentu Integradu Munisipál (PDIM) tinan-2023 ne’ebé kompañia hosi Olhão Unipesóal.lda mak sai nu’udar manán-na’in.
“Kompañia identifika no sobu nune’e hahú ona reabilita hanesan kalen inklui odamatan no janela,” Administradór postu Baucau Vila informa ba Agência TATOLI iha Vila Antiga, segunda ne’e.
Edifísiu refere nu’udar patrimóniu autoridade Baucau ne’ebé konstrui hosi okupasaun portugés nune’e bainhira finaliza reabilitasaun sei utiliza prosesu atendimentu ba postu Baucau Vila.
“Bainhira remata ita sei muda ba fatin foun ne’ebé seguru hodi halo atendimentu publiku ho di’ak,” Insencinio da Silva akresenta.
Postu administrativu Baucau Vila iha seksaun rua komposta hosi serbisu lokál administrasaun no serbisu lokál dezenvolvimentu komunitária ho totál funsionáriu na’in-hitu.
Projetu refere hahú selebra kontratu iha loron-30 marsu ho númeru 03/KDM-BCU/III/2023 na’in ba obra Autoridade Munisipál Baucau ho valór orsamentu $ 94. 287,73 ho durasaun kontratu tinan-ida.
Jornalista : Natalino Belo
Editór : Evaristo Soares Martins
