PD husu órgaun soberanu tenke hamatan ba joven dezempregu
MANATUTO, 17 maiu 2023 (TATOLI)—Partidu Demokrátiku (PD) ho númeru sorteiu haat (4), husu ba órgaun soberanu haat hanesan Governu, Estadu, Tribunál, no Parlamentu Nasionál atu hotu-hotu tau matan ba juventude dezempregu sira iha rai-laran.
“Dezempregu ne’e la’ós prioridade Governu de’it maibé Estadu mós tau haree kestaun ne’e. Ita hakarak órgaun soberanu haat tenke hamutuk hodi tau matan ba dezempregu ne’e, labele Governu de’it,” Sekretáriu Ezekutivu Partidu Demokrátiku, Jacinto Barros Gusmão, hateten ba Agência Tatoli liuhosi telefónika, kuarta ne’e.
Nia hateten, bainhira atu dehan Governu mak tenke tau matan ba joven dezempregu ne’e sei defisil uitoan maibé atu di’akliu ne’e órgaun soberanu sira iha Timor-Leste tenke hamutuk, nune’e bele redús dezempregu ne’e.
“Tanba ne’e, ho PD nia programa prioridade ida mak atu hamenus dezempregu ba juventude sira iha rai-laran no rai-li’ur. Dezempregu ne’ebé la’ós Governu nia responsabilidade de’it maibé presiza mós órgaun soberanu haat hamutuk hodi bele responde kestaun dezempregu iha ita-nia rai doben ne’e. Ida-ne’e PD tau prioridade,” nia hateten.
Nia dehan, órgaun haat presiza duni tau-matan, timoroan labele dezempregu ba iha nia rain rasik no labele sai bainaka iha nia rain.
“Ita tenke loke kampu traballu ba ita-nia joven, nune’e labele involve iha krime ka halo violénsia iha ita-nia rain. Nune’e, ami PD hakarak tau prioridade hodi hasai juventude hosi dezempregu no PD hakarak ba mudansa no kaer metin ukun rasik-aan,” nia hateten.
Jornalista : Osória Marques
Editór : Cancio Ximenes
