DILI, 23 maiu 2023 (TATOLI)—Xefe Bankada CNRT iha Parlamentu Nasionál (PN), Deputadu Duarte Nunes, parabeniza povu Timor-Leste tomak ne’ebé partisipa ona iha eleisaun parlamentár hodi ezerse direitu votu loron eleisaun 21 maiu 2023 ho pás.
“Lori bankada nia naran hato’o ami-nia parabéns ba povu tomak ne’ebé bele ezerse nia direitu votu ho di’ak, ne’ebé ho pás no estabilidade durante kamapaña to’o eleisaun,” Xefe bankada CNRT ne’e hato’o liuhosi reuniaun plenária PN, tersa ne’e.
Nia mós apresia serbisu PNTL, F-FDTL ne’ebé halo duni serbisu ho profisionál hodi asegura estabilidade durante períodu prosesu demokrátiku la’o.
Xefe bankada CNRT apresia mós lidér partidu polítiku balun ne’ebé deklara katak sei kontribui ba estabilidade no simu rezultadu ne’ebé povu nia desidei liuhosi sira-nia votu.
Maibé, nia parte triste uitoan ho prosesu kontajen tabulasaun votu hosi Sekretáriadu Tékniku Administrasaun Eleitorál (STAE) iha domingu kuaze paradu oras balun nia laran.
“Triste uitoan tanba loron hirak liu ba ema hotu ko’alia, ha’u rasik mós akompaña STAE la transparente hanesan uluk iha eleisaun prezidensiál. Maibé, ikus-ikus tenta ladún iha transparánsia, lahatene intensaun saida. Ha’u haree Diretór STAE dehan maneira ida sira tenta halo maibé la viola lei, ita espera laiha hanoin halo manipulasaun ba dadus,” nia hateten.
Nia dehan, tanba dadus ne’e partidu hotu iha no observadór sira mós akompaña, nune’e espera nia rezultadu ne’e labele iha diferensa boot hodi sai motivu ema halo debate naruk no povu nia desizaun ema hotu simu.
Xefe Bankada FRETILIN, David Dias Ximenes ‘Mandati’, sekunda ho intervensaun CNRT kona-ba serbisu STAE hanoin bele buka prova.
“Ha’u konkorda tebes mós hanesan ita nia Xefe Bankada CNRT dehan katak STAE ladún transparente, ha’u haree buka prova, ne’e lei ida tenke iha para ita justifika. Dala ruma ita haluha tiha lei katak ita ne’e iha fali lei nia leten, hodi tau loloos iha ida-idak nia fatin,” nia hateten.
Deputadu hosi Bankada KHUNTO, António Verdiál de Sousa, fó parabéns ba povu Timor-Leste ne’ebé partisipa festa demokrásia ho respeitu, mezmu hetan disturbiu uitoan maibé ida-ne’e lalika tau iha kestaun.
“Atu hateten de’it parabéns ba povu Timor-Leste ne’ebé hamutuk ita partisipa iha festa demokrásia iha domin no dame nia laran nafatin,” nia hateten.
Nune’e mós ba partidu ne’ebé hetan asentu Parlamentár barak liu atu forma Governu iha Governasaun tuir mai, Deputadu KHUNTO ne’e husu atu haree didi’ak timoroan hotu-hotu ne’ebé iha kapasidade intelektuál no esperiénsia hodi hatuur ba iha membru ezekutivu nune’e halo serbisu di’ak ba nasaun.
Jornalista : Nelson de Sousa
Editór : Cancio Ximenes
