Proposta kriasaun suku foun 70-resin la aprova
DILI, 07 junu 2023 (TATOLI)—Ministru Administrasaun Estatál (MAE), Miguel Pereira de Carvalho, hateten proposta kriasaun suku foun hamutuk 80 ne’ebé submete ba MAE maibé suku 70-resin mak la aprova tanba presiza halo análiza ba finanseira.
“Ministériu Administrasaun Estatál simu proposta suku sira atu kria suku foun hamutuk 80, maibé Governu halo análiza kritériu hodi kria suku sira, análiza finanseira no mós halo análiza ba sirkuntánsia sira seluk, tanba ne’e la aprova. Entaun, hosi ne’e mandatu ida-ne’e ita kria suku foun sia (8) de’it,” nia hateten ba jornalista sira iha Palásiu Governu, Dili, kuarta ne’e.
Miguel hatutan, tanba VIII Governu Konstitusionál labele aprova entaun ida-ne’e hein Governu foun mai se bele halo análiza.
“Ha’u fiar katak Governu foun mai sei toma konsiderasaun ba asuntu sira-ne’e,” nia hateten.
Suku foun sira-ne’e, sei tama iha vigór iha loron 01outubru tinan 2023, ho objetivu atu fasilita komunidade sira hodi asesu ba sentru suku sira, aproxima autoridade lokál ba promove komunidade sira no dezenvolvimentu iha rejiaun sira-ne’e.
Suku iha Timor-Leste daudaun hamutuk 452, postu administrativu 66 no municípiu 13, inkluiu Rejiaun Administrativa Espesiál Oé-Cusse Ambeno (RAEOA).
Jornalista : Osória Marques
Editór : Cancio Ximenes
