Estoke kombustível iha Baucau sufisiente
BAUCAU, 09 maiu 2023 (TATOLI) – Estoke kombustível mina gazolina iha sentru abastesimentu munisípiu Baucau sei sufisiente hodi hein distribuisaun hosi nasionál.
Diretór kompañia Belijo Fuel, Afonso da Costa Gusmão, eplika, estoke gazolina abastesimentu Belijo fuel atuál menus hosi tonelada lima nune’e posibilidade sei labele atende hotu kliente sira nune’e parte dirijente la autoriza sosa ho maneira ense iha jerigen.
“Hahú horisehik taka sedu no la autoriza kliente sira-ne’ebé lori jerigen, maibe fiar katak domingu mina bele tama fali ona” Diretór Belijo Fuel hateten iha Vila Nova, sesta ne’e.
Diretór Manudare unipessóal, lda, Helio Francisco hateten, fukun hosi estoke kombustível menus mai hosi Autoridade Nasionál Petrolio Minerais (ANPM) tanba distributór hanesan Pertamina internasionál no ETO hatama mai Timor Leste tuir espesifikasaun nune’e fó impaktu ba estoke gazolina iha abastesimentu sira hotu.
“Falla ne’e bainhira ANPM defini ninia espesifikasaun mina, pertamina ho ETO atu hatama mai Timor espesifikasaun ne’e tenke tuir ANPM ninia standar, tantu ba mina gazolina ho gazoel,” Helio Francisco akresenta.
Pedro Pereira Oliveira nu’udar kondutór preukupa mina gazolina iha sentru postu abastasimentu kombustível sira hahú menus tanba situasaun ne’e fó impaktu ba motorista sira atu hala’o movimentasaun.
Observasaun Agência TATOLI iha terrenu, nota katak tótal abastesimentu kombustível iha munisípiu Baucau hamutuk sia, maioria sei kontinua halo atendimentu ba kliente sira tantu motorizada no karreta ne’ebé hala’o operasaun iha Baucau.
Maske nune’e folin kombustível hanesan mina gazolina atuál litru ida $1.35, enkuantu gazoel litru ida ho folin $1.06
Jornalista : Natalino Belo
Editór : Evaristo Soares Martins
