MS ho liña ministeriál prepara ba prevensaun bainhira moras rabies tama iha TL

DILI, 09 juñu 2023 (TATOLI) – Ministériu Saúde hamutuk ho liña ministeriál sira no parseiru enkontru hodi diskute kona-ba preparativu no preventiva bainhira moras rabies tama iha Timor-Leste.

“Ami ohin hamutuk iha ne’e, hanesan Ministériu Agrikultura no Peskas, Ministériu Interiór, Ministériu Administratasaun Estatal no Organizasaun Munidál Saúde (OMS) hodi ko’alia kona-ba moras rabies ne’ebé mak iha ona ita-nia viziñu NNT ne’ebé bele mós fó ameasa ba ita-nia rain entaun situasaun ida ne’e bolu ona ami ne’ebé mak responsbiliza ba área ida ne’e atu tur hamutuk haree ona medidas prevensaun saida mak tenke foti hanesan planu asaun integradu ne’ebé mak ami tenke foti”, Diretora Jerál Prestasaun Saúde Odete da Silva Viegas informa ba jornalista sira iha salaun MS Caicoli, ohin.

“Depois ami-nia enkontru atu haree ba medida preventive, karik intervensaun saida mak ita atu prepara bainhira rabies ne’e tama ita-nia rain ka asu ruma tata ona ita-nia populasaun saida maka ita atu foti. Depois enkontru ida ne’e ami sei halo sosializasaun ba baze liuliu iha fronteira Batugade, Salele Mota masin no Oesilu”, Nia esplika.

Nia adianta, bainhira ekipa integardu sira tun ba iha baze atu fó hanoin ba komunidade sira liuliu pesoál sira ne’ebé mak servisu iha fronteira atu bele haree ba asu ruma tama mai Timor-Leste  atu hapara no mós medida saida mak sira atu fó ba populasaun sira iha área fronteira.

“Bainhira ekipa integradu sira tun ba baze atu fó hanoin ba ita-nia komunidae liuliu ba pesoál sira ne’ebé mak servisu iha fronteira atu bele haree asu ruma mak tama mai ita-nia rain tenke iha ona mekanismu oinsá atu hapara no mós medidas no informasaun saida mak ita fó ba ita-nia populasaun iha área fronteira no mós populasaun ne’ebé mak daudaun ne’e hakiak asu sira tenke iha mós informasaun ba sira atu sira hatene kona-ba moras ne’e”, nia hateten.

Iha fatin hanesan, Diretora Nasionál Veterenaria iha Ministériu Agrikultura no Peskas (MAP), Joanita Bendita da Costa, hateten enkontru ohin ne’e oinsá atu halo preparative kona-ba moras rabies tama Timor-Leste.

“Ohin loron kontinuasaun ba enkontru ida ne’ebé mak hala’o ona tanba ne’e ami hakarak hato’o mesajen hodi fahe ba ita-nia komunidade sira liuliu sira ne’ebé mak hela iha fronteira ne’ebé mak sai hanesan área risku katak informasaun ne’ebé mak ami kontinua simu sei iha ema ida ka rua ne’ebé mak sei hatama nafatin asu husi parte fronteira nian entaun asu balun hatudu sinais klínika no balun la hatudu sinais bainhira ita haree sira hanesan saudável hela maibé to’o tempu  nia virus ne’e komesa aumenta asu nia isin entaun nia mai hatudu sinais klínika para hada’et moras ne’e ba ema seluk”, Joanita Bendita da Costa subliña.

Komadante Unidade Patrollamenttu Fronteira Interinu, Superentedente Asistente Polísia  Carlos Moniz Maia, afirma tuir artigu 78 husi lei orgánika aprosimasaun Timor-Leste nian ne’ebé mak fó ona mandatu no espesifiku ba Unidade Patrollamentu Fronteira atu halo asegura seguransa iha fronteira no mós fó apoiu kontrola ema no sasan ne’ebé tama sai iha fronteira.

“Ligadu ho enkontru ohin kona-ba moras rabies nian ami preparadu iha área fronteira hodi haree  ema no sasan tama sai iha fronteira mesmu ami hasoru difikuldade oinoin hanesan kondisaun dalan no koñesimentu konsiénsia ita-nia komunidade sira iha fronteira liga mós ba sira nia nesesidade báziku lorloron nian”, nia konklui.

Jornalista : Felicidade Ximenes

Editór : Zezito Silva