BOBONARO, 17 juñu 2023 (TATOLI)—Federasaun Futeból Timor-Leste (FFTL) hamutuk ho Asosiasaun Futeból Bobonaro no Autoridade munisípiu, sábadu ne’e, halo abertura ba jogu futeból Telkomcel Cup sub-17 époka 2023, iha kampu Futeból Maliana Vila, munisípiu Bobonaro.
Iha jogu dahuluk ne’e, klube As Fition manán adversáriu Kuda-ulun ho golu úniku hosi Jogadór, Sezunho da Costa Caero Lopes (11) iha minutu 81.
Prezidente Asosiasaun Futeból munisípiu Bobonaro, Domingos Gouveia, enkoraja jogadór sira atu mantein disiplina no hatudu jogu kualidade tanba objetivu hosi eventu ne’e atu identifika no prepara fini jogadór Bobonaro nia.
“Hau husu ba jogadór sira hosi klube 11 ne’ebé mai kompete iha eventu ne’e, atu hatudu imi-nia esportivita no talentu, labele joga ho brutalidade, ne’e la tempu ona, agora tempu para hatudu saida mak hetan ona hosi ita-nia treinadór sira,” nia fó hanoin.
Notísia Relevante : Kopa FFTL-Telkomcel abertura iha Ermera atu buka fini jogadór
Iha biban hanesan, Sekretáriu Jerál FFTL, Grigório Correia, rekoñese katak munisípiu Bobonaro desde uluk kedas hanesan armazen ba jogadór ho prestasaun di’ak ne’ebé bele reprezenta Timor nia naran bainhira bá joga iha rai-li’ur.
“Espera liuhosi eventu ne’e bele hetan fini jogadór di’ak atu reprezenta klube Bobonaro ba kompete iha munisípiu seluk. Jogu ida-ne’e la’ós iha munisípiu ne’e de’it maibé ba rejionál mak imi manán, imi sei bá nasionál no sei halo selesaun, ne’ebé imi labele hatudu de’it iha ne’e tanba jogu ida-ne’e sei halo imi koñesidu iha nasionál no internasionál,” nia hameno.
Iha sorin seluk, Sekretáriu Autoridade munisípiu Bobonaro, João de Fátima do Carmo, konsidera eventude ne’e bele anima komunidade Maliana tanba iha fulan-rua ba kotuk,ema hotu nia hanoin anima de’it ho polítika, maibé ho aktividade ne’e bele halo fresku sira-nia kakutak.
Notísia Relevante : AFB rejista klubu 12 atu kompete iha TELKOMCEL Cup sub-17
Nia mós agradese ba Telkomcel, FFTL no Asosiasaun Futeból Bobonaro ne’ebé iha inisiativa di’ak hodi realiza eventu ne’e.
“Ami espera katak liuhosi jogu ida-ne’e bele hetan jogadór di’ak para aban bain-rua bele lori munisípiu Bobonaro nia naran ba oin,” João tenik.
Koordenadór Telkomcel munisípiu Bobonaro, Lurdes do Rego Amaral, hateten, Telkomcel kontinua iha kompromisu atu apoia FFTL hodi realiza eventu ne’e iha tinan oin mai.
“Ita-nia objetivu atu halibur foin-sae sira iha ne’e hodi Kria amizade no fraternidade entre joven sira, liu-liu joven potensiál di’ak iha área desportu atubele haree hetan sira iha nível munisípiu no to’o nasionál, karik iha oportunidade bele ba kompete mós iha internasionál,” nia adianta.
Eventu ne’e uza orsamentu hosi Telkomcel $1.500 no hosi Asosiasaun Futeból $1.200.
Jornalista : Sérgio da Cruz
Editora : Julia Chatarina
