APS Baucau rejista dezastre naturál 36
BAUCAU, 23 juñu 2023 (TATOLI) – Autoridade Protesaun Sivíl munisípiu Baucau rejista kazu dezastre naturál durante trimestrál daruak hamutuk 36.
Komandante Autoridade Protesaun Sivil Munisípiu Baucau, Inspetór Polísia, Aleixo Ximenes, esplika, dezastre hirak-ne’e akontese iha postu administrativu haat hanesan anin sobu uma, inséndiu no rai-halai.
“Kazu hamutuk 36 maioria anin sobu uma no inséndiu inklui rai halai,” Komandante Autoridade Protesaun Sivil munisípiu Baucau informa ba Agência TATOLI iha Vila Antigaa, kinta ne’e.
Hosi kazu hirak-ne’e postu administrativu Baucau Vila hamutuk sia, Baguia 10, Laga ida no Quelicai hamutuk 16 ne’ebé kategoria inséndiu hamutuk neen, rai-halai 17 no anin sobu uma hamutuk 13.
APS Baucau durante tinan-2023 apoia emerjénsiaia ba vítima dezastre naturál hamutuk uma-kain 99 ne’ebé akumuladu hotu hodi fó apoia jerál iha trimestrál daruak tanba razaun menus transporte.
APS Baucau liuhosi ekipa verifikasaun direitamente hala’o ona levantamentu dadus kona-ba uma estragu hosi dezastre naturál ba nasionál atu hetan apoia materiál konstrusaun hanesan kustu atividade no kalen tuir kategoria estragu.
“Ita sei hein tanba prosesu tanba ne’e vitíma sira seidauk simu apoia rekuperasaun,” Inspetór Polísia Aleixo Ximenes akresenta.
Kauza hosi akontesimentu inséndiu tanba maioria komunidade abandona laiha kontrolu bainhira sunu lilin iha ortòriu inklui sirkuitu elétrika.
Enkuantu anin sobu no rai halai akontesimentu naturalmente to’o hamosu uma estragu tanba komunidade balun hela iha rai lolon no mota ninin inklui uma balun iha foho leten.
APS atuál kontinua sosializa kona-bá métodu prevensaun fazeadamente iha kada suku ne’ebé indentifikadu área risku dezastre naturál hanesan suku Samalari, postu Baucau Vila no Tekinomata, postu Laga.
Jornalista : Natalino Belo
Editór : Evaristo Soares Martins
