Família Pascoela “konsumu kumbili la signifika hahán laiha”
BAUCAU, 23 juñu 2023 (TATOLI) – Família hosi Pascoela de Sá lamenta ho publikasaun kona-ba kondisaun ekonomia uma-laran ne’ebé sai virál iha rede sosiál facebook, tanba konsumu kumbili la signifika hahán laiha.
Fidelia de Sá Soares nu’udar inan hosi Pascoela de Sá, esplika, hanesan ema agrikultór sempre konsumu hahán lokal hanesan kumbili, fehuk no talas maibé la siginifika laiha ona hahán ne’ebé publika iha rede sosiál facebook.
“Ha’u nu’udar Pascoela nia mamá sente xokadu ho publikasaun iha mídia facebook, tanba alin ne’e halo publikasaun la konsidera ha’u,” Fidelia de Sá Soares hateten iha Uaikua, sesta ne’e.
Fidelia Soarers konta tuir kronolojia publikasaun infromasaun refere iha facebook hanesan, pesoál espalla insiál AG halo vizita uma Pasquela iha Uaikua, aldeia Uasemu, suku Bucoli, postu Baucau vila hodi husu tuir kondisaun moris ba avo mane hosi Pascoela to’o publika iha facebook laiha konfirmasaun ba família.
Pascoela de Sá idade 21, oan ba dalima hosi maun-alin na’in-ualu, moris mai ho kondisaun ema ho defisiénsia ka sofre moras nune’e tenke toba de’it iha uma maibé hela ho inan no hein hosi nia avo mane.
Pascoela de Sá nia maun nu’udar traballadór iha diáspora Reinu Unidu ne’ebé sempre apoia família relasiona ho ekonomia uma-laran nune’e la’ós laiha hahán atu sustenta moris loron-loron.
“Ami iha hahán maibe kumbili ne’e hahán lokal ne’ebé sempre konsume bainhira matabisu,” Fidelia Soares akresenta.
Bainhira informasaun refere publika iha facebook, família hosi Pascoela halo kedas reasaun hodi kontaktu malu tanba konsidera nu’udar difamasaun hasoru família ho autoridade suku Bucoli.
Nune’e, família Pascoela de Sá bolu pesoál publika iha rede sosiál ho inisiál AG hodi husu deskulpa iha loron kinta, 22 juñu liuhosi prezensa autoridade suku no komandu Polísia Nasionál Timor-Leste munisípiu Baucau.
Pascoela de Sá rejista nu’udar defisiénsia ne’ebé hetan subsídiu ka benefisiária ema ho ne’ebé sempre hetan apoia osan inklui materiál seluk hosi Ministériu Solidaridade Sosiál no Inkluzaun (MSSI).
Antes ne’e, publikasaun informasaun facebook iha loron-20 juñu hetan reasaun hosi publiku hanesan komentáriu parte solidariedade ba kondisaun moris Pascoela de Sá ne’ebé nu’udar ema ho defisiénsia.
Jornalista : Natalino Belo
Editór : Evaristo Soares Martins
