APC Baucau rejista vítima dezastre naturál uma-kain sia
BAUCAU, 06 jullu 2023 (TATOLI) – Autoridade Protesaun Sivíl munisípiu Baucau, rejista vítima dezastre naturál hamutuk uma-kain sia durante udan loron-tolu.
Segundu Komandante Operasionál APS Baucau, José Cabral, esplika, akontesimentu udan hahú hosi loron 02 to’o 05 jullu afeta iha postu admistrativu Quelicai, suku rua hanesan Maluru no Bualale, kauza hosi rai halai hodi estraga uma komunidade nian.
“Udan halo rai halai tanba komunidade sira hela besik estrada tanba estrada refere hetan reabilitasaun,” Segundu Komandante APS informa ba Agência TATOLI iha Vila Antiga, kinta ne’e.
Suku Maluru akontese iha aldeia Uaguia hamutuk uma-kain rua mak hetan estragu, enkuantu hosi suku Bualale iha aldeia Lialura hamutuk uma hitu komposta hosi uma lima iha ameasa laran no uma rua seluk estragu kamaan.
Ekipa tékniku operasionál APS direitamente to’o iha fatin akontesimentu hodi rekolla dadus hafoin simu informasaun hosi autoridade suku kona-ba uma komunidade sira-ne’ebé hetan estragu.
“Too oras ne’e ami foin hetan informasaun hosi suku rua ne’e deit, enkuantu seluk seidauk,” José Cabral akresenta.
APS Baucau hato’o ona relatóriu ba nasionál atu tau atensaun hanesan apoia sosiál hanesan materiál konstrusaun.
APS Baucau enkoraja ba komunidade hotu atu sai hosi fatin risku ba hela provizoriu iha fatin seguru nune’e antesipa mosu dezastre naturál to’o halakon vida.
Jornalista : Natalino Belo
Editór : Evaristo Soares Martins
