Agrikultór sei kolleta Hare époka dahuluk iha Baucau
BAUCAU, 10 jullu 2023 (TATOLI) – Agrikultór sira hahú koilleta Hare époka dahuluk tinan 2023 nian iha munisípiu Baucau.
Diretór Serbisu Munisipál Agrikultura Baucau, Moisés Lobato Perreira, esplika, liuhosi estensionista sira iha baze kontinua akompaña hodi fó asisténsia no monitoriza ba prosesu hotu relasiona ho kolleta Hare hanesan métodu kuda inklui kolleta iha munisípiu Baucau.
“Hare iha époka dahuluk seidauk remata, sei iha faze kolleta no dadus seidauk tama,” Diretór Serbisu Munisipál Agrikultura Baucau informa ba Agência TATOLI iha Vila Nova, segunda ne’e.
Fatin sira-ne’ebé finaliza ona kolleta mak hanesan postu administrativu Vemasse, Venilale, enkuantu suku Seiçal, postu Baucau Vila, Tekinomata, postu Laga, postu Quelicai, postu Baguia, suku Defauasi, Uacala no Lavateri ho totál ektare rihun 10-resin.
Hosi totál área kultiva refere, serbisu Munisipál Agrikultura trajetu kada tinan kolleta hamutuk tonelada rihun 40-resin no hosi rezultadu ne’e sei konverte ba foos hamutuk tonelada rihun 20-resin.
Maske nune’e númeru loloos époka dahuluk seidauk iha relatóriu tanba foin iha faze kolleta no posibilidade bele redus tanba tinan-ne’e kuaze agrikultór sira menus halai natar.
Fatór seluk ne’ebé afeta ba redasaun produsaun tanba redasaun iha área kultiva inklui kondisaun irrigasaun balun la konsege normaliza.
“Espera tinan-ne’e mantein produsaun,” Moisés Perreira akresenta.
Tuir dadus iha tinan-2022, Serbisu Munisipál Agrikultura Baucau rejista totál produsaun Hare hamutuk tonelada 42.280 ka ekivalente ba foos purvolta tonelada 25.368 hosi totál ektare rihun 10-resin.
Jornalista : Natalino Belo
Editór : Evaristo Soares Martins
