DILI, 12 jullu 2023 (TATOLI)—Governu liuhosi Ministériu Komérsiu hamutuk ho liña ministeriál no ajénsia autónomu sira sei tau prioridade estabelese urjente laboratóriu integradu ida.
Vise-Ministru Komérsiu, Augosto Junior Trindade, hateten, inisiativa ne’e ho objetivu apoiu Institutu Kualidade Timor-Leste (IQTL, sigla portugés) nia servisu.
“IX Governu nia planu prioridade durante loron-120 mak iha laboratóriu integradu ida, tanba durante tinan-20 resin ona ita iha problema boot kona-ba exportasaun produtu tanba laiha sertifikadu orijen ba teste kualidade produtu,” Vise-Ministru hateten iha Metiaut, kuarta ne’e.
Notísia relevante : Alfándega presiza mini laboratóriu hodi halo teste ba produtu importasaun
Nia konsidera laboratóriu integradu ne’e importante tanba Timor-Leste iha produtu orgániku barak maibé laiha sertifikadu orijen ruma ne’ebé bele fasilita, tanba ne’e produtu lokál barak mak la halo exportasaun.
Laboratóriu integradu ne’e la’ós de’it fasilita IQTL maibé mós bele fasilita Autoridade Inspesaun no Fiskalizasaun Atividade Ekonómika Santitária no Alimentár, Institutu Públiku (AIFAESA,I.P) inklui instituisaun sira seluk nia servisu.
“Ita sei reforsa AIFAESA, I.P halo servisu inspesaun loloos ba merkadu sira hodi haree loloos situasaun reál iha merkadu liga ho folin sasán,” nia akresenta.
Aleinde ne’e, IQTL halo ona esforsu maka’as, tanba ne’e daudaun iha ona progresu preparasaun finál estabelese laboratóriu.
“Ita sei servisu hamutuk ho liña ministériál no ajénsia sira atu funsiona ita-nia laboratóriu integradu ida urjente iha Timor, la’ós de’it ba komérsiu, bele mós ba saúde no sira seluk. Laboratóriu ba AIFAESA, I.P rasik iha ona iha Tibar maibé fasilidade seidauk iha, nune’e sei servisu hamutuk ho IQTL atu dezenvolve hamutuk,” governante ne’e tenik.
Antes ne’e, Prezidente IQTL, Rosito de Monteiro, hateten, tinan ne’e institutu sei sosa mákina tolu hanesan ekipamentu teste ba kafé, mina nuu, no bee.
Mákina tolu ne’e nia espesifikasaun mak atu kahur produtu hodi bele define kualidade sasán, ekipamentu ne’ebé uza ba análiza ne’e rasik, inklui ekipamentu ba meteorolojia ninian.
“Ita sosa uluk mákina item tolu ne’e tanba prioridade liu no bazeia ba pedidu hosi ita-nia parseiru setór privadu sira atu teste ba sira-nia produtu durante halo exportasaun, liu-liu kafé, mina nuu no bee. Signifika ita sosa ekipamentu tolu ne’e mai, ita estabelese ona laboratóriu nasionál, maibé seidauk kompletu tanba item tolu ne’e foin halo teste ba exportasaun de’it,” nia dehan.
Item tolu ne’e ho kustu $105.000, enkuantu ekipamentu seluk sei prevee ba orsamentu tinan oin mai.
Jornalista : Arminda Fonseca
Editora : Julia Chatarina
