DILI, 12 jullu 2023 (TATOLI)—Diretór Nasionál Empregu no Exteriór (DNEE) iha Sekretaria Estadu Formasaun Profisionál no Empregu (SEFOPE), Filomeno Soares, hateten, daudaun ne’e Polísia Imigrasaun Koreia Súl detein tan traballadór timor-oan na’in-rua.
“Antes ne’e, Polísia Imigrasaun Koreia Súl kaer uluk ema na’in-lima. Semana ne’e ha’u simu tan informasaun hosi ita-nia adidu katak Polísia kaer tan timor-ona na’in-rua ne’ebé daudaun sira na’in-hitu mak iha hela fatin detensaun Imigrasaun Koreia Súl nian,” Diretór informa ba Agência Tatoli, iha ninia knaar fatin, Becora, kuarta ne’e.
Timor-oan sira ne’ebé daudaun iha fatin detensaun Polísia Imigrasaun Koreia Súl ne’e, la’ós tama sela maibé fatin detensaun de’it.
“Sira submete ba investigasaun relasiona ho dokumentu no erru sira ne’ebé halo, hotu mak sei deporta fali. Ita seidauk hatene loron atu deporta sira tanba sei iha investigasaun nia laran, sei husu tuir durante sira halo atividade ilegál ne’e keta kontra lei ruma ka krime ruma, investigasaun sira ne’e hotu mak deporta sira mai,” nia akresenta.
Notísia relevante : Polísia Imigrasaun Koreia Súl kaer timor-oan na’in-lima komete serbisu ilegál
Polísia Imigrasaun Koreia Súl la’ós detein de’it traballadór timor-oan maibé mós hosi nasaun 10 seluk ne’ebé iha akordu.
“Iha Koreia Súl, Prezidente Yoon Suk-Yeol ne’ebé kaer ukun agora ho rigorozu tebes, hakarak hamenus traballadór sira. Ho ida-ne’e mak Polísia Imigrasaun haree ba traballadór sira ne’ebé halo atividade ilegál sira. Timor-oan sira ne’ebé serbisu iha Koreia Súl no daudaun ses hosi sistema ne’e iha 1.000 resin ona,” Diretór tenik.
Haree ba númeru ne’e, SEFOPE kontinua husu ba traballadór sira ne’ebé foin ba no prepara-an atu arranka, tenke respeita regulamentu sira, liu-liu labele ses hosi sistema tanba lei Koreia daudaun ne’e rigorozu tebes.
“Bainhira imi kontinua halo atividade ilegál ka ses hosi sistema, bele fó impaktu mai ita tanba empregadór bele hamenus númeru traballadór hosi kuota ne’ebé kada tinan sira husu. Traballadór sira ne’ebé komete atividade ilegál no Polísia Imigrasaun kaer ona, tuir lei bainhira deporta ona, durante tinan-hitu sira labele fila bá Koreia Súl tanba naran rejistu hotu ona iha sistema,” nia fó hanoin.
Tuir dadus, hahú hosi tinan 2009 to’o 2023 SEFOPE konsege ona haruka traballadór 5.604 bá serbisu iha Koreia Súl.
Jornalista : Arminda Fonseca
Editora : Julia Chatarina
