Suku Fatulia finaliza ona PMOPA faze dahuluk
BAUCAU, 11 jullu 2023 (TATOLI) – Autoridade suku Fatulia, postu administrativu Venilale, munísipiu Baucau, finaliza ona implementasaun Programa Mão de Obra Postu Administrativu (PMOPA) faze dahuluk.
Xefi suku Fatulia, Angelino Moisés Perreira, esplika, programa refere finaliza ona iha fulan-juñu hafoin traballadór sira implementa ho durasaun loron-20 liuhosi atividade reparasaun estrada eskala kiik iha suku refere.
“Ita ezekuta no finaliza ona faze dahuluk nian iha fulan-juñu,” Xefe suku Fatulia informa ba Agência TATOLI iha Vila Nova, tersa ne’e.
Atividade refere envolve traballadór informál hamutuk na’in-160, komposta hosi grupu haat ne’ebé kada grupu na’in-40 nune’e hala’o reparasaun estrada purvolta kilómetru liman resin, kompostu aldeia Uatulia-ana kilómetru rua, Bahadato kilómetru ida, Osso-uaque kilómetru ida no Uai-to-Bono kilómetru ida resin.
“Orsamentu la liuhosi ami maibe postu administrativu mak halo pagamentu direita inklui sosa materiál,” Angelino Perreira akresenta.
Angelino Perreira konsidera programa refere fó benefísiu ba komunidade tanba liuhosi atividade reparasaun estrada bele fasilita transportasaun produtu ba merkadu no kontribui rekuperasaun ekonomia traballadór sira hosi suku refere.
Orsamentu PMOPA ba postu administrativu Venilale hamutuk rihun $100 fahè ba kustu administrasaun pursentu 5 no kustu operasionál pursentu 95.
Suku Fatulia hamutuk aldeia haat komposta hosi aldeia Uatulia-ana, Bahadato, Osso-uaque no Uai-to-Bono ho totál populasaun hamutuk 2.721 hosi uma-kain hamutuk 688.
Jornalista : Natalino Belo
Editór : Evaristo Soares Martins
