iklan

EKONOMIA, BAUCAU, HEADLINE, MUNISÍPIU

MOP kontrata kompañia lokál normaliza estrada iha Baucau

MOP kontrata kompañia lokál normaliza estrada iha Baucau

Diretór Serbisu Munisipál Obra Publika Baucau, Pedro Alexandre Guterres Perreira. Imajen Agência TATOLI/Natalino Belo.

BAUCAU, 14 jullu 2023 (TATOLI) – Governu liuhosi Ministériu Obra Publika kontrata kompañia lokál hodi manutensaun estrada rurál ho tipu emerjensia iha munisípiu Baucau.

Diretór Serbisu Munisipál Obra Publika Baucau, Pedro Alexandre Guterres Perreira, esplika, kompañia ne’ebé hetan fiar hosi MOP mak Roman Grigio Unip.Lda ho durasaun kontratu tinan-rua ho valor inisal orsamentu rihun $600.

“Ita hanaran projeitu manutesaun liuliu emerjensia sira, bainhira dadus foti sei relata ba nasionál mak orienta kompañia ba normaliza,” Diretór Serbisu Munisipál Obras Publika Baucau informa ba Agência TATOLI iha Vila Nova, sesta ne’e.

Kontratu refere ho númeru MPW-W-280040 ho akordu serbisu rutina manutesaun liuhosi baze performansaun ne’ebé asina kontratu iha fulan-maiu ne’ebé lokaliza iha área postu administrativu hotu munisípiu Baucau.

Serbisu Munisipál Obra Publika Baucau responsavel de’it ba dadus hanesan distansia sei relata ba nasionál hodi konta volume no valor orsamentu antes orienta kompañia halo manutesaun.

“Ida-ne’e hanesan aternativa ida molok IGE tama bainhira volume boot,” Pedro Pereira akresenta.

Alende ne’e bainhira kompañia halao serbisu manutesaun sei pagamentu kada-loron ba ekipamentu pezadu sira ne’ebé utiliza iha obra refere.

Serbisu Munisipál Obra Publika Baucau konsidera liuhosi kontratu refere bele fasilita komunidade bainhira iha estrada rurál hetan estragus inpaktu hosi iklima hanesan udan no rai halai.

Jornalista     : Natalino Belo 

Editór           : Evaristo Soares Martins 

iklan
iklan

Leave a Reply

iklan
error: Content is protected !!