DILI, 17 jullu 2023 (TATOLI) – Diresaun Nasionál Asaun Sosiál Eskolár, Ministériu Edukasaun (ME), sei distribui, semana ne’e, materiál emerjénsia ba Eskola Bázika Filiál (EBF) haat iha Bobonaro ne’ebé afetada ba dezastre naturál.
Diretór Nasionál Asaun Sosiál Eskolár, Joaquim Martins, haktuir katak diresaun deside apoia de’it maka EBF haat iha Bobonaro tanba lagrave liu hanesan eskola tolu seluk iha Liquiçá no Covalima ne’ebé nia kondisaun aat totál.
“Ami-nian ekipa sira tun ona bá terrenu no halo ona identifikasaun katak iha eskola EBF hitu mak afetadu ba dezastre naturál. Husi eskola sira ne’e tolu grave liu tanba rai halai no haat ne’e nia kakuluk de’it maka naksobu no tahu maka nakonu iha área eskola oin”, Joaquim Martins dehan iha Vila Verde.
Apoia materiál ne’e sei dirije de’it ba EBF Sibuni Mape Kailaku, EBF Katólika Seloi, EBF Roe-tete no EBF Kota Boot.
“Ba eskola tolu seluk, rua iha Liquiçá mak EBF Lebuana Mau-meta no Luku Lai. Kondisaun eskola rua ne’e grave tebes tanba rai halai taka tomak tiha eskola ne’e. Presiza hetan apoiu husi IGEADE atu hasai tiha rai-henek sira iha eskola rua ne’e atu normaliza fali kondisaun. EBF Julotas iha Covalima kuaze sala sia inklui moru eskola no kampu rua nakonu tahu. Ida ne’e presiza mós intervensaun husi Diresaun Nasionál Dezenvolvimentu Parke Eskolár nian atu halo fali planu ba futuru”, katak.
Ho dezastre sira ne’ebé akontese no danifika tiha eskola sira ne’e, iha munisípiu Lautém laiha estabelesimentu eskolár ida maka afetadu, maibé mota mak lori estudante ida.
Relasiona ho verifikasaun ne’ebé maka ekipa sira relata ona ne’e diresaun promete ona katak semana ida ne’e bele distribui ona materiál emerjénsia hanesan ai, kalén pregu, ba eskola sira.
Tuir dadus ME, dezde 2013, eskola ne’ebé afetada ba dezastre naturál iha territóriu hamutuk 37, husi totál ne’e apoia ona materiál emerjénsia ba eskola 23 no sei falta 14 maka seidauk tanba kondisaun estrada lapermite atu transporta ekipamentu.
Notísia relevante: Dezastre naturál danifika eskola rua iha Liquiçá
Jornalista: Tomé Amado
Editora: Maria Auxiliadora
