Sala lima iha EBF Builekun la seguru ba estudante sira
MALIANA, 17 jullu 2023 (TATOLI) — Kondisaun sala aula lima iha eskola Ensinu Báziku Filiál (EBF) Builekun, suku Balibo Vila, postu administrativu Balibo, munisípiu Bobonaro la seguru ba estudante sira atu tuir prosesu aprendizajen kada loron.
Koordenadór EBF Buileku, João Lalek Soares, haktuir eskola refere konstrui iha tempu okupasaun Indonézia 1992 no iha tinan 2005 mak reabilita hosi parseiru internasionál.
“Ita haree ba kondisaun eskola iha parte ida sorin ne’ebá ne’e maka ladún di’ak hanesan janela, plafon sira moos aat hotu ona, ita haree nia azuleju sira moos dalaruma nakfera hotu tanba kondisaun rai mak ladi’ak. Ida-ne’e ami sente la seguru bainhira ita hala’o aprendizajen, tanba ta’uk hela kuandu anin-boot bele mosu asidente ruma kona estudante ka profesor sira,” nia informa ba jornalista sira iha Maliana.
Nia konfirma prekupasaun kona-bá kondisaun infraestrutura refere parte dirijente eskola sira relata ona ba Servisu Munisipál Edukasaun Bobonaro.
Nia parte moos hamutuk ho profesór sira hola inisiativa troka kalen iha uma kakuluk nune’e tempu udan labele tama eskola laran.
“Ami nia eskola ne’e maske kondisaun hanesan ne’e maibé prosesu aprendizajen la’o di’ak hela hanesan bainbain, ami-nia fasilidade eskola mos sufisiente hela,” nia katak.
Tuir dadus totál estudante iha EBF Bulekun hosi primeiru anu to’o sestu anu hamutuk 131 ho totál profesór na’in-lima komposta hosi permanente na’in-tolu, kontratatu rua no voluntáriu na’in-ida.
Jornalista: Sérgio da Cruz
Editór: Evaristo Soares Martins
