iklan

OPINIAUN

Tempu ba IX Governu ho “Tempu ba Mudansa”

Tempu ba IX Governu ho “Tempu ba Mudansa”

Memensio Sequeira Freitas.

(Perspetiva pesoál ba Kompromisu IX Governu durante Tinan lima)

Hosi: Memensio Sequeira Freitas*)

Lia makloke 

Antes toma pose, atuál Primeiru-Ministru, Kayrala Xanana Gusmão, hetan konvite ida hosi GMNTV iha 15 juñu 2023 atu fó palestra ida ho tema “Tempu ba Mudansa” ne’ebé sai mós hanesan broadcasting foun ba GMNTV nian. Líder boot rezisténsia nian ne’e konsentra liu ninia hanoin kona-ba mudansa ne’ebé Timor-Leste tenke atinje mak mudansa mentalidade, mudança de ser atu joven sira la’ós hatene de’it reklama sira-nia direitu maibé tenke banati tuir katuas sira uluk ne’ebé hatene kumpre ninia devér iha luta libertasaun pátria.

“Tenke muda hanoin katak labele iha ema uitoan de’it mak goza iha rai ida-ne’e no barak liu la hetan buat ida hodi kontinua moris ho sira-nia ki’ak (mukit). Mudansa hirak ne’e sei bele hetan bainhira ita halo mudansa ba kualidade ensinu iha ita-nia rain” (PM, Kay Rala Xanana Gusmão).

Nune’e mós, iha diskursu Primeiru-Ministru emposada nian iha tomada pose loron 01 jullu 2023, líder nasionál ne’e dala ida tan subliña kona-ba mudansa. Mudansa ida-ne’ebé tuir Primeiru-Ministru, Kay Rala Xanana Gusmão, konsidera importante atu halo mak rekrutamentu funsionáriu públiku sira liuhosi teste méritu tuir dalan legal sira, tanba sistema sira-ne’e estabelesidu ona dezde IV Goveru Knstitusionál nia tempu kedas. Primeiru-Ministru kompromete mós katak Governu ida-ne’e sei halo diferensa iha planu, iha asaun no iha jestaun ba responsabilidade.

Mehi boot atu halo mudasan imediata ida-ne’e lori to’o reuniaun dahuluk Konsellu Ministru nian ne’ebé realiza iha Palásiu Governu, iha 04 jullu tinan ida-ne’e. Mudansa balun (pontu 12 ne’ebé define iha reuniaun Konsellu Ministru ba dahuluk) tenke akontese ona dentro loron 120 dahuluk governasaun ida-ne’e. Karik, to’o loron ne’ebé determinadu, katak durante loron 120 ne’e mak la akontese mudansa ruma, pode ser bele mosu remodelasaun iha estrutura Governu, tanba Primeiru-Ministru kompromete ona katak sé mak servisu lahatene, sai! Ne’e katak, Membru Governu sira tenke servisu ho rezultadu iha tempu badak atu komprova sira-nia kualidade ba konfiansa ne’ebé sira simu hosi Primeiru-Ministru.

Mudansa no kestaun sira-ne’ebé tenke Muda durante Governasaun 

Liafuan mudansa mai hosi dalen Latina, Mutatio, de Mutare katak muda, troka fatin. Iha dalen portugés, liafuan mudança signifika alteração ou modificação do Estado normal de algo: mudança de caráter. Mudansa mós bele signifika akizisaun iha ábitu (toman) foun sira, nakloke atu aprende ka estuda buat foun ruma, ka buka estilu foun moris nian (new lifestyle), halo revizaun ba valór, regra no kompromisu sira. Mudansa nu’udar oportunidade ba iha kualkér organizasaun ida, inkluindu iha vida Estadu ida-nian atu hasa’e ka mellora di’ak liután dezempeñamentu no produtividade. Ezijénsia ida-ne’ebé hamosu mudansa mak nesesidade atu responde ba situasaun no ambiente moris nian ne’ebé sempre muda ba-mai no muda-aan tun-sa’e.

Eskritór no inspiradór negósiu, Simon Sinek, iha ninia ideia murak ida-ne’ebé dehan “Infinite mindset is fundamentally constant improvement”, katak mudansa nu’udar konsekuénsia hosi nesesidade atu dezenvolve tantu nu’udar individu komu organizasaun. Mudansa ne’ebé akontese iha organizasaun (inklui iha Estadu) normalmente engloba vizaun sira-ne’ebé nakfilak aan nu’udar objetivu hosi organizasaun refere. Lembra katak iha konstiusisaun RDTL, iha artigu 6 hatuur loloos objetivu hosi Estadu ida-ne’e nian, nune’e, esforsu no mudansa hotu-hotu ne’ebé Goveru ida halo tenke atinje objetivu Estadu nian ne’ebé konsta ona iha Lei Inan.

Mudansa ida-ne’ebé aprezenta hosi Primeiru-Ministru, Kay Rala Xanana Gusmão, ne’e sei fó mós impaktu ba mudansa sosiál karik atinje duni. Mudansa sosiál katak tranzisaun ida-ne’ebé muda sosiedade nia ordem da vida ne’ebé akontese ho kontinuidade, tanba hanesan seres sociais, ema iha karáter dinámiku no sempre hakarak muda aan. Ida-ne’e mós komprova katak ser umanu nunka para ka satisfas iha pontu balun durante nia vida, maibé sira sempre hakarak mudansa tuir rítmu tempu ida-nian. Sientista boot Sosiaiolojia nian, Max Weber, aprezenta katak mudansa sosiál ne’e nu’udar situasaun ida-ne’ebé akontese iha sosiedade ne’ebé kauza hosi diferensiasaun ho nia elementu sosiál sira.

Matanek na’in, Aris, iha ninia artigu ida entituladu “Pengertian perubahan sosial: proses, bentuk, faktor dan contohnya” publikadu iha Gramedia blog, aprezenta fatór hitu (7) ne’ebé kontribui ba mudansa sosiál. Fatór sira-ne’e mak hanesan deskobrimentu foun ruma, númeru populasaun ne’ebé aumenta, mosu konflitu, akontese revolusaun, sosiedade ne’ebé nakloke, motivasaun (ambisaun) atu hetan prestasaun di’ak no sistema edukasaun ne’ebé avansadu.

Se ita liga palestra iha fórum GMNTV no diskursu iha loron tomada pose nian ba iha fatór sira be aprezenta hosi Aris iha leten, ha’u hanoin fatór ne’ebé dudu Primeiru-Ministru hakarak halo mudansa iha ninia governasaun ida-ne’e mak ambisaun ka motivasaun atu iha prestasaun governativa ida-ne’ebé di’akliu (avo Nana temi ho liafuan hakarak halo diferensa) no tenke enkuadra aan iha sistema edukasaun ida ho kualidade. Aleinde fatór rua ne’e, ha’u hanoin tanba Timor-Leste hanesan mós país ida-ne’ebé nakloke liuhosi adezaun ba organizasaun mundial oioin, inklui adezaun ba ASEAN, entaun mudansa ne’e nesesáriu tebes atu ita atinje.

Primeiru-Ministru, Kay Rala Xanana Gusmão, iha konviksaun no mehi boot atu halo mudansa iha ninia governasaun ida-ne’e. Figura hanesan Kay Rala Xanana Gusmão ne’e laiha buat ida mak imposível ba nia atu halo no atu hamosu. Se funu ida defisil nakonu ho sakrifisiu de’it nia bele ultrapasa, fará mais halo de’it mudansa iha nia Governasaun? Ho ida-ne’e, aleinde pontu 12 ne’ebé difine ona iha Reuniaun dahuluk Konsellu Ministru nian, há’u hanoin nesesária mós atu halo mudansa iha aspetu rua importante mak “burokratizasaun iha atendimentu públiku” no “politizasaun kargu funsionál sira iha instituisaun Estadu nian”.

Kona-ba “burokratizasaun”, Eisienstadt, N.S., (1960), iha ninia artigu Problems of Emerging Beraucracies in Developing Areas and New States deskreve burokrasia nu’udar organizasaun moderna ho ninia konseitu baze ne’ebé dezenvolve hosi Max Weber tanesan forma organizasaun rasionál ne’ebé ideál, entidade ida ho kompeténsia plena maibé ho kritériu no kondisaun balun hodi garante no hala’o funsionamentu sistema administrasaun públika Estadu nian.

Daudaun ne’e, kamada sosiedade konsidera “burokrasia” nu’udar organizasaun ida-ne’ebé iha atu atende ka halo atendimentu públiku ba sosiedade sira ho presunsaun negativu hanesan prosesu tratamentu dokumentu ne’ebé han tempu no ho sistema komplikadu, la amigável, la justu, la transparente, difikulta no selu-seluk tan (Meyer, 2022). Ilustrasaun ba burokrasia ho hanoin sira hanesan ne’e normál tanba esperiénsia sira-ne’ebé la tuir sosiedade nia hakarak akontese duni no sente rasik hosi povu simples sira, inklui iha ita nia rain durante ukun rasik aan.

Lembra katak. atendimentu públiku iha ligasaun direta ho Governu, tanba responsabilidade ida hosi Governu mak fó atendimentu ba ninia povu. Kualidade atendimentu públiku ne’ebé povu tenke simu diretamente sai hanesan sasukat atu avalia kualidade governasaun ida. Bele dehan, atendimentu públiku iha ninia dezenvolvimentu mosu tanba ezisténsia devér ka obrigasaun governasaun ida-nian nu’udar prosesu hosi organizasaun atividade Governu nian.

Iha Timor-Leste durante ukun aan dékada rua resin, ita sente duni presunsaun negativa sira hanesan ne’e. Buat simples ida de’it, bainhira ema ba legaliza nia dokumentu ruma iha Servisu Notariadu, presiza tempu semana ida kedas atu nia bele simu fali ninia dokumentu legalizadu. Ezamplu seluk, ema moras ida urjentemente tenke hetan atendimentu ba USG (Ultrassonografia) maibé tanba limitasaun sira-ne’ebé iha, pasiente refere tenke hein semana ba semana no molok nia hetan atendimentu refere, ninia moras grave tiha ona. Atendimentu sira hanesan ne’e divia ita presiza ona hadi’a atu halais prosesu, tanba dala ruma povu presiza ho urjente atu trata asuntu importante ruma iha ninia vida.

Faktu seluk ne’ebé ita labele nega maibé akontese duni durante dékada rua ne’e nia laran mak prosesu rekrutamentu ba funsionáriu Estadu nian. Dala barak, vaga ne’e loke ba públika maibé ema-ne’ebé atu selesionadu ne’e iha nanis tiha ona. Vaga sira-ne’ebé loke iha entidade sira Estadu nian ne’e dala barak formalitas de’it mibés iha tiha ona ema “ïha laran” ne’ebé servisu antes tiha ona. Mamosuk sira hanesan ne’e akontese beibeik no kuaze instituisaun públiku barak mak aplika buat ne’e. Aat liután mak iha reklamasaun balun hateten dehan iha ema balun la tuir prosesu selesaun maibé nia mak selesionadu fali.

Aleinde ne’e, mosu politizasaun boot iha administrasaun públika durante ne’e, liu-liu kargu dirasaun no kargu xefia sira iha ministériu laran. Kargu direaaun no kargu xefia sira-ne’e regula tuir Dekretu-Lei Nú. 20/2011, 8 juñu, primeira alteração ba Dekretu-Lei Nú. 27/2008, 11 Agosto. Nune’e, dalan di’akliu ba nomeasaun ba kargu dirasaun no xefia sira iha kada ministériu presiza la’o tuir artigu sira-ne’ebé konsta iha Lei refere duké la’o tuir fali interrese partidáriu ka polítika.

Loos duni katak entre burokrasia no polítika tenke la’o hamutuk no bele sai ekipa servisu ne’ebé di’ak iha administrasaun públika. Maibé, tenke tetu mós katak importante atu halo separasaun entre burokrasia no interrese polítika. Bainhira ita-nia Governu iha korajen atu separa buat rua ne’e ba malu mak ha’u fiar katak mudansa bele mosu iha administrasaun públika no ho nune’e administrasaun públika bele presta rezultadu servisu ida di’ak efikáz, efisiente no efetivu liu.

Durante ne’e, bainhira partidu ida ba ukun, kargu dirasaun no xefia sira sempre domina hosi kór partidu polítiku no ida-ne’e sai tiha fali hanesan toman aat ida ne’ebé buras iha Timro-Leste. Nune’e, bainhira eleisaun ramata no Membru Governu sira troka malu, partidu nia ema sira iha ministériu preokupa liu kargu saida mak sira sei hetan iha ministériu laran (tanba sira sente katak sira mós servisu ba partidu nia vitória). Situasaun ida-ne’e mós hamosu vingansa iha ministériu laran no bele kria mós situasaun inkonfortável. Sira-ne’ebé okupa hela kargu dirasaun no xefia sira sente ameasadu bainhira mosu Governu foun, enkuantu sira seluk buka oinsá bele okupa fila-fali ho dalan konfiansa polítika. Ida-ne’e bele prejudika direta mós ba kontinuasaun governativa nian.

Realidade ida hanesan ne’e konserteza ladi’ak ba ita-nia prosesu dezenvolvimentu. Ábitu aat sira-ne’e presiza muda. Ita hotu fiar katak IX Governu Konstitusionál ne’ebé lidera hosi eis Comandante em Chefe das FALINTIL ne’e sei muda ho toman foun, katak buat hotu tuir de’it Lei no la’ós tuir inteerese polítika. Só ho nune’e de’it mak ita bele evita dezvia sentidu loloos hosi Eleisaun Parlamentár.

Objetivu prinsipál ida hosi eleisaun kada tinan lima ne’e mak atu garante kontinuidade hosi dezenvolvimentu nasionál. Ne’e katak, Eleisaun Parlamentár labele sai fali mákina atu ema okupa kargu funsionál sira iha administrasaun públika tuir kór no inteerese partidu polítiku hodi ignora kompeténsia méritu no teknokrata nian.

Dala ida tan, Primeiru-Ministru Kay Rala Xanana Gusmãohakarak halo diferensa iha ninia governasaun, mak ha’u no ita hotu fiar katak sei laiha politizasaun ba kargu dirasaun, kargu xefia inklui rekrutamentu funsionáriu públiku iha administrasaun públika. Tanba, tempu ba IX Governu Konstitusionál mak “Tempu ba Mudansa”. (*)

 

iklan
iklan

Leave a Reply

iklan
error: Content is protected !!