USAID-MS realiza formasaun kona-ba monitorizasaun baze ba saúde
DILI, 17 jullu 2023 (TATOLI) – Diretora Misaun USAID iha Timor-Leste, Zema Semunegus hamutuk ho Vise-Ministru Saúde ba Fortalesementu Institusionál, José Magno, lansa formasaun kona-ba monitorizasaun baze saúde ba ofisial Ministériu Saúde (MS) no membru sosiedade sivíl sira.
“Haree ba monitorizasaun ho baze komunitária ba saúde ne’e relevante atu komunidade sira bele sai na’in ba saúde, asesu ba informasaun ne’ebé sira presiza, rona sira-nia lian no sira-nia nesesidade. Partisipasaun komunitária iha planeamentu, implementasaun no monitorizasaun programa saúde nian sai nu’udar xave ba responsabilidade no apoiu ba reforsu sustentável sistema saúde komunitária nian”, Diretora Misaun USAID Zema Semunegus dehan liuhosi komunikadu ne’ebé TATOLI asesu, ohin.
Partisipante ne’ebé envolve iha formasaun ne’e mai hosi Munisípiu Ermera, Manufahi no Covalima. Membru Rede ba Saúde Timor-Leste (REBAS-TL) no sira sei hetan abilidade no kompeténsia sira ne’ebé dezeña atu hametin sira-nia envolvimentu ho komunidade sira hodi dezeña, implementa no monitoriza intervensaun sira hodi hadia adosaun hahalok saudável sira.
USAID nia Atividade ba Sustentabilidade Sistema Saúde servisu hamutuk ho MS no organizasaun sosiedade sivíl sira hodi promove hahalok saudável iha komunidade sira, nune’e mós hametin advokasia atu hasa’e asesu no utilizasaun kuidadu saúde ne’ebé justu no kualidade.
Monitorizasaun ho baze komunitária ba saúde ho objetivu atu halo ponte ba lakuna entre komunidade no fornesedór saúde sira liuhusi dezenvolve no implementa sistema no instrumentu sira ba imput komunidade nian ba planeamentu no dezenvolvimentu saúde nian.
USAID suporta implementasaun intervensaun bazeia ba komunidade iha suku 19 iha Munisípiu Ermera, Manufahi no Covalima. Formasaun ne’e hala’o iha kapitaál Dili durante loron lima.
Jornalista: Hortencio Sanchez
Editór : Zezito Silva
