BAUCAU, 18 jullu 2023 (TATOLI) – Autoridade suku Triloka, postu administrativu Baucau Vila remata ona implementa Programa Mão de Obra Postu Administrativu (PMOPA) faze dahuluk tinan 2023 nian.
Xefe suku Triloka, Alexandre da Costa, esplika, programa refere finaliza iha loron-16 jullu no traballadór sira simu ona orsamentu hosi postu administrativu Baucau Vila nune’e hein atu kontinua implementa tan faze daruak hafoin reuniaun konsellu postu.
“Maske la’ós ba komunidade hotu maibé benefísia ona ba traballadór sira hodi ajuda sira-nia ekonomia uma-laran,” Xefi suku Triloka hateten iha Vila Antiga, tersa ne’e.
Alexandre da Costa konsidera programa refere importante no rekomenda atu governu kontinua tanba sistema implementasaun la liuhosi kompañia maibé direita ba komunidade hodi hadi’a ekonomia uma-laran.
Suku Triloka implementa atividade limpeza jerál iha arreadór sede suku, limpeza kampu futebool no limpeza estrada iha suku ho durasun serbisu loron-18 hosi total traballadór informál na’in-60 fahe ba grupu tolu.
Postu Baucau Vila sei hetan alokasaun orsamentu hamutuk rihun $100 ne’ebé aloka ba kustu operasionál rihun $5 no kustu atividade rihun $95 ne’ebé fahé ba suku 11 ho atividade faze rua no sei envolve traballadór hamutuk 931.
Totál orsamentu PMOPA ne’ebé aloka ba munisípiu Baucau tinan-2023 hamutuk rihun $600, kada postu administrativu hetan alokasaun rihun $100, komposta hosi kustu operasionál pursentu 5 no kustu atividade pursentu 95 no sei envolve traballadór informál hamutuk 5.588.
Jornalista : Natalino Belo
Editór : Evaristo Soares Martins
