iklan

EKONOMIA, BAUCAU, HEADLINE, MUNISÍPIU

TIC Timor fahe informasaun kona-bá Indentidade Úniku iha Baucau

TIC Timor fahe informasaun kona-bá Indentidade Úniku iha Baucau

Ajénsia TIC Timor fahe informasaun kona-bá programa Identidade Úniku ba autoridade lokál sira iha postu admini strativu Baucau Vila, iha salaun apuramentu munisípiu, Vila Nova, tersa (18/07). Imajen Agência TATOLI/Natalino Belo.

BAUCAU, 18 jullu 2023 (TATOLI) – Ajénsia Teknolojia Informasaun no Komunikasaun Timor (TIC Timor, IP, sigla portugés) tersa ne’e, fahe informasaun kona-bá Identidade Úniku (IDU) ba autoridade suku iha postu administrativu Baucau Vila, munisípiu Baucau.

Diretór Identidade Uniku TIC Timor, Florindo Guterres da Costa, esplika, atividade foka ba sistema implementasaun IDU no fahe informasaun ba autoridade lokál kona-ba progresu prosesu programa refere.

“Importánsia mak oinsá ema hotu-hotu, liuliu autoridade lokál bele komprende no benefísiu iha futuru, sira tenke iha informasaun klaru nune’e futuru rejistrasaun autoridade lokál hatene ona papél inklui bele konvense komunidade bele partisipa ho konsiénsia rasik,” Diretór Identidade Úniku TIC hateten iha Vila Nova, tersa ne’e.

Prosesu progresu sei iha faze dezenvolvimentu sistema IDU, maske atuál iha ona Komisaun Nasionál Aprovizonamentu (CNA, sigla portugés) hodi haree kompañia manán-na’in ba projetu refere ne’ebé tuir planu sei implementa iha tinan-2023.

IDU hanesan identidade dijitál ho funsaun atu fasilita interligasaun entre institusaun estadu hotu nune’e bainhira verifika dadus ba sidadaun sira serteza katak kada sidadaun iha indentidade ida de’it.

TIC iha mapeamentu ba programa refere hanesan faze no programa sei hala’o iha tinan 2023 to’o 2024, legál no institusionál tinan 2023, dezenvolvimentu sistema IDU tinan 2024, rejistrasaun no validasaun sei hahú hosi tinan 2024 to’o 2026.

Xefe suku Triloka, Alexandre da Costa, hateten, sorumutu ne’e importante tanba hasa’e koñesimentu autoridade lokál hotu nune’e bainhira implementa programa rejistrasaun iha ona koñesimentu iha baze.

“Kompara Timor-Leste iha bandeira nasionál ida de’it entaun sisadaun tenke iha identidade ida de’it,” Alexandre da Costa hateten.

Partisipa iha atividade ne’e Prezidenti Autoridade Munisipál (PAM) Baucau, Olivio ‘Bou-lesa’ Freitas, Administradór postu Baucau Vila, Insencinio António da Silva, xefe suku no aldeia hosi postu admistrativu Baucau vila.

Jornalista    : Natalino Belo 

Editór           : Evaristo Soares Martins

iklan
iklan

Leave a Reply

iklan
error: Content is protected !!