BHI disponibiliza formasaun ba jestór saúde
DILI, 21 jullu 2023 (TATOLI) – Ekipa internasionál hosi Build Health International (BHI), parseria ho Fundu Globál fó formasaun kona-ba asisténsia, aprovizionamentu no instalasaun Oxijéniu ba jestór sira hosi Servisu Autónomu Medikamentu no Saúde (SAMES), Hospital Nasionál Guidu Valadares (HNGV), Diresaun Nasionál Farmasia no Medikamentu (DNFM) no Diresaun Nasionál Apoiu Servisu Hospitalar (DNASH).
formasaun ne’e prosede iha salaun Novo Turismo foin lais, formandu hamutuk ema 30-resin no formasaun durante loron rua.
Objetivu fundamentál hosi formasaun ba plant oxijéniu nian mak oinsá bele prepara jestór sira atu komprende didi’ak kona-ba estabelesimentu PSA Plant iha Timor-Leste tanba iha relasaun mós ho ekipamentu kapasitasaun rekursu umanu no mós kapasitasaun finanseiru atu asegura plant ne’e ninia funsionamentu ba futuru.
Administradór Divizaun Fundu Globál Noe Gaspar Pinto hatete formasaun ne’e haree liuba 𝑠𝑎𝑓𝑒 𝑎𝑛𝑑 𝑠𝑒𝑐𝑢𝑟𝑖𝑡𝑦 atu bele fasilita tékniku sira komprende oinsá atu asegura plant ne’ebé mak estabiliza ninia funsaun ba tempu naruk.
“Enkuandu ita laiha sistema kontrola entaun ita laiha koñesementu, ita-nia mákina hirak ne’e bele la kleur aat, la kleur aat no ita investe osan boot depois aat beibeik entaun ninia rezultadu másimu utilizasaun ba investimentu ne’e ladún di’ak”, administradór divizaun tenik liuhosi komunikadu ne’ebé Agência TATOLI asesu, ohin.
Hosi BHI ne’ebé Fundu Globál parseria, iha espesialidade ba Planta Oxijéniu iha mundu tomak no sira mai halo asesment durante loron rua kona-ba kondisaun infrastrutura iha Timor-Leste.
“Ita-nia formandu na’in-30-resin hosi SAMES, HNGV, DNFM, DNASH ne’ebé mak iha responsabilidade direta iha operasionál mákina konstrusaun ida-ne’e iha futuru, hosi programa sira mós mai partisipa atu sira bele komprende orsamentu ne’ebé mak sira aloka fó duni kontribuisaun ba setór saúde iha Timor-Leste”, nia konklui
Jornalista: Hortencio Sanchez
Editór : Zezito Silva
