Governu sei kria ‘’data centre’’ kontrola servisu iha área rurál
DILI, 31 jullu 2023 (TATOLI) – Vise Primeiru-Ministru no Ministru Koordenadór ba Asuntu Dezenvolvimentu Rurál Mariano Assanami Sabino, dehan Governu sei kria data centre hodi kontrola servisu iha área rurál hodi aselera dezenvolvimentu ba komunidade.
“Ita sei harii data centre atu haree servisu saida mak halo iha aldeia hotu iha territóriu nasionál, se mak tama ona, servisu karik servisu saida no saida mak sei falta ita tenke kompleta atu lori moris di’ak ba nível okos liu”, Assanami hateten ba Agência TATOLI iha Palásiu Governu, segunda ne’e.
“Hosi buat hirak ne’e hotu mak ita atu hasa’e kapasidade, hasa’e koñesimentu, sentru formasaun tenke tau iha aldeia ida-idak, bainhira ema hotu iha ona esperiénsia no kapasidade servisu mak hamoris ona ekonomia ida ne’ebé ho kontinuidade labele injeta de’it depois para tiha, durante ne’e suporta lubuk ida mak ita halo la haree ba oin, ikus buat hotu nafatin la’o hakdasak, ida ne’e ita sei hadia buat hirak ne’e hotu maibé presiza ema hotu, povu hotu, partidu hotu nia kontribuisaun atu hadia ita-nia nasaun ne’e”, nia dehan.
Ministeriu ne’ebé nia lidera iha ona planu bainhira orsamentu retifikativu iha ona sei rekruta joven transformadór ho kakutak di’ak atu koloka iha Suku hotu iha territóriu nasionál atu halo servisu ba ita nia komunidade sira.
“Ida ne’e iha ona planu, bainhira orsamentu retifikativu remata ona ita haree ba asuntu ne’e, totál ema hira mak ita sei rekruta hodi servisu iha nível kraik, sei iha prosesu seidauk hatene los hira mak ita sei rekruta maibé sei fó sai ba públiku bainhira prosesu la’o ona”, nia hakotu.
Assanami ho Embaxadór Japaun diskute kona-ba dezenvolvimentu rurál
Vise Primeiru Ministru no Ministru Koordenadór ba Asuntu Dezenvolvimentu Rurál Mariano Assanami Sabino hasoru malu ho Embaxadór Japaun iha Timor-Leste Kimura Tetsuya hodi ko’alia kona-ba servisu hamutuk hodi aselera dezenvolvimentu rurál.
“Embaxadór Japaun mai para ita identifika liután servisu saida mak ita halo iha nível okos liu, tanba futuru ita hanoin katak dezenvolvimentu tenke integradu ona, ida ne’e ita mós presiza servisu ho ita-nia parseiru internasionál sira”, Assanami dehan ba jornalista-sira iha Palásiu Governu, segunda ne’e.
Nia dehan, bainhira orsamentu retifikativu remata, ekipa ida sei tun ba baze atu halo konsulta no halo levantamentu dadus hodi halo mapeamentu hodi haree servisu importante saida mak durante ne’e halo ona no oinsa kontinua.
“Ita tun ba kraik atu haree no halo mapeamentu ba buat ne’ebé mak durante ne’e Planu Dezenvolvimentu Suku (PNDS), ajénsia internasionál sira halo, ita tenke koloka para integradu atu nune’e ita bele aselera dezenvolvimentu ida makas atu hasai ita-nia povu hosi kiak ne’e”, nia relata.
“Servisu ne’ebé ita atu halo mak ne’e, Estrada iha área rurál, bee-moos, eletrisidade no telekomunikasaun, atu bele hamoris ita-nia ekonomia atu iha sustentabilidade”, nia hakotu.
Iha fatin hanesan Embaxadór Japaun iha Timor-Leste Kimura hateten, dezenvolvimentu rurál sai hanesan prioridade ba Japaun nia apoiu ba Timor-Leste.
“Ami hakarak atu hatudu ami-nia komitmentu hodi apoiu Governasaun ida ne’e, buka dalan atu suporta liután programa Governu nian iha futuru”, embaxadór afirma.
Área kooperasaun ne’ebé sai prioridade ba Japaun atu suporta mak dezenvolvimentu infraestrutura bázika, hadia servisu sosiál sira, hanesan Japaun sempre koopera hamutuk ho ajénsia internasional sira no Governu hodi implementa projetu sira iha nível baze hanesan harii eskola, harii postu saúde no fornesimentu bee-moos ba komunidade.
NGO Japaun servisu makas iha projetu reflorestasaun hodi hadia hikas ai-laran hirak ne’ebé mak iha tinan ba kotuk hetan estraga hosi ema nia hahalok no inundasaun no hadia mós irigasaun hotu iha territóriu nasionál ne’ebé dezastre naturál estraga iha 04 ábril tinan kotuk.
Jornalista: Hortencio Sanchez
Editór : Zezito Silva
