Agência TATOLI propoen rihun $35 iha OR

August 1, 2023
10:46 PM
Facebook Instagram X WhatsApp Telegram

Sekretáriu Estadu Komunikasaun Sosiál, Expedito Dias Ximenes, akompaña Prezidente Konsellu Administrasaun RTTL, E.P, José António Belo ‘Taraleu’ no Prezidente Konsellu Diretivu TATOLI, I.P, Manuel Pinto, aprezenta orsamentu retifikativu 2023 RTTL E, P no Tatoli,I.P nian ba Membru Komité Revizaun Orsamentu (KRO), iha salaun Ministériu Finansas Dili, tersa (01/08). Imajen Tatoli/Francisco Sony

DILI, 01 agostu 2023 (TATOLI) – Agência Notisiosa de Timor-Leste, Instituto Público (TATOLI, IP) propoen rihun $35 iha Orsamentu Retifikativu tinan 2023 hodi responde ba dívida no servisu tékniku balun.

“Difikuldade balun TATOLI hasoru kona-ba selu dívida, entaun Komite Revizaun Orsamentu Retifikativu fornese tan rihun $35 atu rezolve sira-nia dívida no seluk tan”, Sekretáriu Estadu Komunikasaun Sosiál (SEKOMS) Expedito Dias Ximenes dehan ba jornalista-sira iha edifísiu Ministériu Finansas (MF) Dili, tersa ne’e.

Iha fatin hanesan, Prezidente Agência TATOLI, Manuel Pinto, dehan orsamentu tinan 2023 ba TATOLI hamutuk $ $647,806.00 no propoen tan rihun $35 atu selu dívida hosi fulan jullu to’o dezembru.

“Orsamentu TATOLI nian alokadu iha tinan 2023 hamutuk $647,806.00, hosi orsamentu ne’e ita ezekuta ona 54%, adisiona $35,522.00 atu responde ba dívida”, nia subliña.

Divida ne’ebé TATOLI iha mak selu eletrisidade, komunikasaun (liña internet no upgrade UPS Hosting) no pagamentu ba servisu vijilánsia seguransa.

Hosi totál orsamentu ne’ebé ezekuta ona $354,132.22 (54%), obrigasaun, $3,760.39, kompromisiu $26,595.40 (4%), balansu $267,317.99 (41%).

Jornalista: Hortencio Sanchez

Editór : Zezito Silva