OÉ-CUSSE, 01 agostu 2023 (TATOLI) – Servisu Nasionál Ambulánsia Emerjénsia Medika, Institutu Públiku (SNAEM,IP), tersa ne’e fahe informasaun no sesaun prátika kona-bá Matadalan Prátika Klinika (MPK) ba ekipa servisu ambulánsia sira iha Rejiaun Administrativa Espesiál Oé-Cusse Ambeno (RAEOA).
Notísia relevante: MS-Parseiru lansa matadalan MPDSR iha Timor-Leste
Diretora Nasionál Operasaun SNAEM.IP, Costodia Benevides Florindo, informa, atividade dizeminasaun ne’e realiza durante loron rua, hahú tersa to’o kuarta semana ne’e, ho objetivu atu hasa’e koñesimentu ba ekipa servisu ambulánsia sira iha RAEOA hodi kualifika atendimentu emejénsia ba públiku.
“Diseminasaun ne’e oinsa dezenvolve matadalan prátika klínika ne’e, inísia kedas bainhira SNAEM estabelese iha janeiru 2021, tenke iha matadalan ida atu ekipa ambulánsia bele presta sira-nia servisu ba iha komunidade, tenke iha dokumentu ida hodi asegura sira bele banati tuir,” Diretora Nasionál Operasaun SNAEM.IP, ko’alia iha diseminasaun ne’e.
Nia relembra, iha 2017 to’o 2021, iha dokumentu kona-bá SOP ba servisu ambulánsia nian, maibé ho matadalan ida-ne’e, halo revizaun balu no hahú dezenvolve ona ho topiku foun ida, atu fasilita pesoál saúde sira, hosi mediku, enfermeira, parteira no servisu ambulánsia sira atu presta di’akliu-tán servisu liga kazu sira-ne’ebé motivu emerjénsia.
Adjuntu Diretór Servisu Saúde RAEOA, Fugundo Lafo, konsidera diseminasaun ne’e importante atu divulga ba iha servisu saúde sira iha munisípiu nune’e bele fasilita atu presta servisu di’akl iután hodi garante atendimentu kualidade públiku.
“Servisu saúde RAEOA agradese tanba ita bele hetan ona matadalan ida, atubele fó apoia hodi presta servisu ne’ebé efetivu no kualidade ba ita-nia komunidade, tan ne’e matadalan ne’e sai hanesan informasaun ida ba ita atu presta ita-nia profisaun téknika liuliu servisu ambulánsia emerjénsia nian,” nia orgullu.
Notísia relevante: SNAEM.IP rekoñese karreta ambulánsia la sufisiente
Xefe Departamentu Servisu Ambulánsia Oé-Cusse, Aniceto de Jesus Pereira, esplika objetivu hosi diseminasaun ne’e ekipa formadór sira hosi servisu sentrál atu introdús matadalan kona-bá prátika klínika ba ekipa ambulánsia sira iha Oé-Cusse.
“Tanba foin dadaun ne’e, Ministra Saúde lansa ona planu estratéjiku hahú 2023 to’o 2028 iha Lautem lansa mós matadalan ida-ne’e, tan ne’e ohin pasu importante ba ekipa SNAEM hotu, tanba foin dala uluk mai halo diseminasaun ba ekipa sira iha Oé-Cusse, tan ne’e agradese tebes,” nia orgullu.
Entretantu, partisipa iha atividade diseminasaun ne’e hamutuk ema na’in-19, komposta hosi mediku hospitál referál Oé-Cusse, mediku hosi sentru saúde no postu saúde sira hosi sub-rejiaun Oésilo, Pante Makasar, Nítibe no Pássabe.
Notísia relevante: MS – OMS instala sentru operasaun emerjénsia saúde iha Lautem
Jornalista: Abílio Elo Nini
Editor: Evaristo Soares Martins
