iklan

DILI, HEADLINE, SAÚDE

MS Elia: “Mai ita hamutuk tulun inan-sira fó susubeen inan ba bebé”

MS Elia: “Mai ita hamutuk tulun inan-sira fó susubeen inan ba bebé”

Ministra Saúde, Elia dos Reis Amaral. Imajen Tatoli/Francisco Sony

DILI, 02 agostu 2023 (TATOLI) – Ministra Saúde (MS) Elia Amaral husu ema hotu atu apoiu másimu ba inan-sira ne’ebé servisu bele fó susubeen-inan nian di’ak ba bebé tanba susubeen-inan nian importante tebes ba labarik.

“Mai ita hamutuk apoiu inan sira ne’ebé servisu, atu bele kontínua fó susu sira-nia oan iha ne’ebé de’it no iha tempu saida de’it, susubeen inan nian importante tebes ba bebé”, Ministra Elia dehan liuhosi komunikadu ne’ebé Agência TATOLI asesu, kuarta ne’e.

Nia dehan, globalmente nasaun hotu iha mundu selebra eventu importante “semana mundiál ba susubeen inan nian” ho tema globál husi selebrasaun tinan ida-ne’e mak “kria ambiente hodi bele fasilita fó susu-been inan, halo diferensa ba Inan-aman ne’ebé servisu”.

Enkuantu tema nasionál nian ne’ebé deside hosi Diresaun Nasional Nutrisaun Ministériu Saúde, hamutuk ho parseirus grupu traballu nutrisaun, iha tinan ida-ne’e mak “Kria ambiente hodi tulun ha’u, atu ha’u bele fó susu ha’u-nia oan iha ne’ebé de’it”

Haree hosi tema ida-ne’e no persentajen real fó susubeen inan esklusivu ba bebé ne’ebé seidauk universál ka to’o 100% iha Timor Leste.

“Fó hanoin no fanu hika’as ita, saida maka presiza halo, hodi tulun inan-feto sira atu fó de’it  susubeen inan ba bebé hahú hosi moris to’o fulan neen dahuluk no kontinua fó susu to’o bebé halo tinan rua ka liu”, ministra esplika.

Timor-Leste nasaun soberanu ho kultura ne’ebé metin iha prátika fó susu, maibé dalaruma inan barak hasoru dezafiu oi-oin tan ne’e, la konsege fó susu-been inan eskluzivamente ba sira-nia bebé.

Ho tema nasionál ba selebrasaun semana mundial fó susu-been inan ba bebé tinan ida-ne’e, nu’udar Ministra Saúde, apela ba ema hotu atu bele kria espasu iha serbisu fatin, hotuhotu hodi bele asegura inan sira kontinua fó susu sira-nia oan, tanba susu-been inan mak prezente ida ne’ebé folin boot hosi inan ba oan sira.

“Semana mundial fó susubeen inan ba bebé ne’ebé nakonu ho domin no dame ba ita hotu”, Elia haklaken.

Jornalista: Hortencio Sanchez

Editór : Zezito Silva

iklan
iklan

Leave a Reply

iklan
error: Content is protected !!