Joven 13.000 aplika teste kursu lian koreia hosi SEFOPE
DILI, 07 agostu 2023 (TATOLI)—Sekretaria Estadu Formasaun Profisionál no Empregu (SEFOPE) liuhosi Diresaun Nasionál Empregu no Exteriór (DNEE) hamutuk ho Korean Student Language Programme (KSLP) iha Timor-Leste, segunda ne’e, halo abertura teste lian koreia ba joven hamutuk 13.000.
Prezidente The Korean Association of Timor-Leste (KATL), Lee Jae Kwon, hateten, inisiativa ne’e atu fó oportunidade ba estudante sira ne’ebé hakarak estuda lian koreia iha KSLP hanesan bukae bainhira bá Serbisu iha Koreia Súl.
“Ami loke teste ba estudante foun ne’ebé mak hakarak atu estuda lian korea iha ami-nia eskola, tinan ne’e ami prontu atu simu 1.500, maibé aplikante ne’ebé tama hamutuk 30.000,” Lee Jae Kwon, hateten iha estádiu Munisipál Dili.
Notísia relevante : Joven na’in-2.023 pasa kursu lian koreia
Nia dehan, joven ne’ebé aplika ona tenke hatene lian Koreia nível báziku no matemátika báziku.
“Teste ne’e realiza durante loron-haat, hahú ohin no sei ramata kinta, teste ne’e hotu ekipa sei verifika mak fó sai rezultadu, sira ne’ebé mak pasa ka naran sai sei tuir kursu lian koreia iha eskola KSLP Becora,” nia tenik.
Jornalista : Arminda Fonseca
Editora : Julia Chatarina
