Autoridade Baucau realiza reuniaun koordenasaun munisipál
BAUCAU, 08 agostu 2023 (TATOLI) – Autoridade administrasaun Baucau, tersa ne’e, realiza reuniaun koordenasaun munisipál hodi diskute ajenda aprovasaun kona-ba reuniaun konsultivu munisipál.
Prezidente Autoridade Munisipál (PAM) Baucau, Olivio ‘Bou-lesa’ Freitas, esplika, reuniaun refere hanesan reuniaun nivel aas iha munisípiu Baucau ho objetivu atu aprova proposta, sujestaun inklui rekomendasaun rezultadu reuniaun konsultivu munisipál ne’ebé antes ne’e realiza ona fulan-juñu.
“Reuniaun KKM inportante tamba alta katak aas liu hodi deside vida liuliu iha aspeitu dezenvolvimentu Baucau,” Prezidente Autoridade Munisipál Baucau hateten iha Vila nova, tersa ne’e.
Agenda ne’ebé diskute hodi aprova iha reuniaun koordenasaun munisipál hamutuk 11 hanesan relatóriu ezekusaun orsamentu, liña prioridade investimentu, relatóriu planu munisipál ordenamemtu territorial.
Projetu prioridade ba investimentu munisipál tinan-2024, lista prioridade estrada rurál no rekualifikasaun ba infraestrutura publiku, BOQ kona-ba parke eskolár Ensinu Baziku Sentral III, prosesu implementasaun merenda eskolár tinan-2023 no programa eskolár ba uma.
Nune’e mos, rekrementu no lakuna kona-ba suku, perspetiva hosi autoridade sira iha Baucau kona-ba faze instalasaun suku no postu no aprovasaun ba agenda sorumutu.
Proposta ne’ebé antes ne’e aprova iha reuniaun konsultivu munisipál hanesan estrada rurál iha Laculio Uaibuitae, estrada Uaini-uma ba turismu komunitária Uatabo, reabilitasaun jardin vila Salazar no fatuk-lenuk.
Prosposta reabilitasaun asrama no moru protesaun sede suku Laisorulai de Baixo, estrada Maluru, moru saudozu Sahe iha Bucoli, Ossoario Fatumaca ba jardin eroi, estrada Uainkasa, suku Ossouala, estrada hosi Uatugiri ba Lelalai.
“Tuir lei tenke halo kada fulan maibe iha adiamentu tanba razaun tempu no serbisu barak,” Bou-Lesa akresenta.
Reuniaun refere hala’o bazea ba artigu 22 to’o 31 dekretu-lei númeru 3/2020 no dekretu-lei númeru 3/2016, artigu 4 to’o 41.
Bou-lesa husu ba membru hotu liuhosi enkontru KKM tenke konsentra no foku atu diskute liuliu kontribui hanoin nune’e bele delibera no aprova ba planu asaun anual hodi sai prioridade ba dezenvolvimentu munisípiu Baucau.
Tuir regulamentu, reuniaun refere realiza ho prenzensa membru na’in-47 ka 2/3 hosi total 64 komposta Prezidenti Autoridade Munisipál, Sekretáriu Munisipál, Administradór Postu, Diretór Serbisu Munisipál hotu inklui xefe suku.
Jornalista : Natalino Belo
Editór : Evaristo Soares Martins
