Baucau prioriza setór haat iha planu asaun anuál 2024
BAUCAU, 08 agostu 2023 (TATOLI) – Autoridade Administrasaun Munisipál Baucau, prioriza setór haat iha planu asaun anuál tinan fiskál 2024 nian.
Prezidente Autoridade Munisipál (PAM) Baucau, Olivio ‘Bou-lesa’ Freitas, esplika, setór haat ne’ebé sai prioridade hanesan setór saúde, agrikultura, edukasaun no bee-moos ne’ebé sei transforma programa no orsamentu ba tinan-2024 iha Baucau.
“Entre setór sira-ne’e, ida tenke sai prioridade la’ós hotu-hotu, maibé ba povu setór sira-ne’e importante hotu,” Prezidente Autoridade Munisipál Baucau hateten iha Vila Nova, tersa ne’e.
Bou-lesa, argumenta, maske nune’e autoridade munisipál sei estabelese tán komisaun revizaun planu asaun anuál tanba mudansa polítika iha kada governasaun ne’ebé iha diferensa.
Setór haat refere hanesan sei kanaliza no distribui bee-moos ba komunidade iha área rurál hanesan postu Quelicai, konstrusaun postu no sentru saúde iha kada postu, reabilitasaun eskolár iha postu Quelicai no Venilale nune’e konstrusaun irrigasaun lokaliza iha área Venilale.
“Ita identifika no levantamentu inklui dezeñu no BOQ ne’ebé lokaliza iha kada postu administrativu,” Diretór Servisu Munisipál Planu Dezenvolvimentu Integradu Munisipál (PDIM), Hermenegildo Rodrigues Fraga hateten.
Maske nune’e desizaun final sei deside hosi governu sentrál tanba planu bele barak maibé sei liuhosi tetu fiskál no bainhira pasa sei bele finaliza hotu planu prioridade hirak-ne’e.
Tuir estimasaun ba planu asaun anúal liuhosi PDIM, autoridade munisipál sei preve orsamentu hamutuk millaun $5 ba tinan-2024.
Jornalista : Natalino Belo
Editór : Evaristo Soares Martins
