Baucau propoin rihun $164 iha orsamentu retifikativu
BAUCAU, 08 agostu 2023 (TATOLI) – Autoridade Administrasaun Munisipál Baucau propoin rihun $164 iha orsamentu retifikativu ne’ebé sei foka ba rekuperasaun vítima dezastre naturál.
Prezidente Autoridade Munisipál (PAM) Baucau, Olivio ‘Bou-lesa’ Freitas, esplika, munisípiu Baucau hato’o proposta orsamentu reaktifikativu hodi haree ba asuntu rekuperasaun vítima dezastre naturál ne’ebé akontese iha tinan-2023 ne’e.
“Osan ne’e sei hadi’a fali uma komunidade sira-ne’ebé hetan estragu kauza hosi dezastre,” Prezidente Autoridade Munisipál Baucau hateten iha Vila Nova, tersa ne’e.
Orsamentu retifikativu sei la afeta ba orsamentu jerál estadu munisípiu Baucau nian ba tinan-2023 nune’e to’o agora seidauk iha resposta hosi nasionál kona-bá proposta refere.
Tuir dadus hosi Autoridade Protesaun Sivíl munisípiu Baucau durante tinan-2023 totál vítima dezastre naturál provizoriumente purvolta uma-kain 20-resin.
Jornalista : Natalino Belo
Editór : Evaristo Soares Martins
