TL-Austrália diskute kombate moras kankru
DILI, 09 agostu 2023 (TATOLI) – Vise-Ministru Operasionalizasaun Ospitál, Flávio Brandão Mendes de Araújo hasoru malu ho Reprezentante Center for Research Excellence in Cervical Cancer Control (C4), Prof. Caren Cartell ho delegasaun hosi Austrália, iha Palásiu Sinzas, hodi ko’alia kona-ba oinsa atu kombate moras kankru iha Timor-Leste.
“Hanesan Governu oinsá mak ita bele kolabora di’ak atu servisu di’ak iha futuru, ha’u fiar katak kombate kankru iha nível hotuhotu, ba oin ita fó mós atensaun mak halo prevensaun ida ne’ebé di’ak liu no halo detesaun sedu ba moras duké ita to’o faze sira ne’ebé mak komplikadu, entaun ita-nia investimentu tenke iha kuidadu saúde primáriu liuliu ba halo prevensaun sira no detesaun sira seluk, ida ne’e mak objetivu husi delegasaun C4”, Vise-Ministru hato’o liuhosi komunikadu ne’ebé Agência TATOLI, asesu, ohin.
Haree ba moras kankru ne’ebé sempre afeta ba joven sira liuliu kankru cervical, liuhusi sorumutu ne’e, ekipa C4 hosi National Health and Medical Research Council (NHMRC) Austrália ne’e foka liu kona-bá oinsá halo prevensaun, tratamentu no kuidadu preventivu ba ema hirak ne’ebé sofre moras ne’e.
Situasaun sira ne’ebé Timor-Leste enfrenta liuhosi hasoru malu nian bele ajuda iha tratamentu kankru ne’ebé haree liu ba pilár tolu maka atu fó vasina ba populasaun sira no labarik sira ne’ebé ho idade husi 9-14, koko (screening) ba inan sira ne’ebé ho idade 30 ba leten no wainhira halo identifikasaun ba kazu sira ne’ebé mak iha, oinsá buka maneira no bele prepara tratamentu.
Austrália sériu tebes atu apoiu Timor-Leste iha área saúde liuliu kombate moras kankru iha nasaun ne’e.
Tuir dadus ne’ebé iha, Global Cancer Statistics 2018, International Agency for Research on Cancer (1ARC) iha tinan 2018 iha totál feto liuhosi 500.000 mak rejistu ba kazu foun ba kankru serviks, hosi ne’e 270. 000 feto mak mate tanba kankru serviks no 85% mate ne’e akontese iha nasaun sira ne’ebé mak tama ba kategória low and middle income Countries).
Jornalista: Hortencio Sanchez
Editór : Zezito Silva
