Konstrui uma ba médiku iha ona faze mapeamentu
DILI, 21 agostu 2023 (TATOLI) – Vise Ministru ba Operasionalizasaun Ospitál (VMOO) Flávio Brandão Mendes de Araujo, dehan Governu iha ona planu atu harii uma ba médiku sira iha teritóriu nasionál, daudaun ne’e tama ona iha faze mapeamentu.
“Prosesu hotu iha ona, agora tama ona ba faze mapeamentu atu ita bele haree médiku, enfremeiru, parteira hira mak abandona ona sira-nia servisu, servisu fatin hira mak seidauk iha, servisu fatin hira mak ema barak liu fali, entaun ami sei rekolla dadus hotu ona mak foin bele harii uma iha kada sentru saúde no postu saúde sira iha fatin remota sira”, vise dehan ba Agência TATOL iha edifísiu Ministériu Saúde (MS) Caicoli, ohin.
Tuir nia, ministériu hakarak fazeadamente katak ospitál rejionál sira tenke iha ona hela fatin ba médiku sira, la’os de’it iha área rurál.
“Ospitál rejionál sira ita hakarak tenke iha mós uma ba médiku sira, enfermeiru sira no parteira sira, atu nune’e sira balu ba servisu iha Baucau, iha Ainaro la iha família sira bele hela iha uma ne’ebé estadu prepara”, nia relata.
Nia dehan, ba oin Governu trata médiku timoroan sira ho dignu liután atu bele fó asisténsia ba komunidade sira iha nível rurál no nasionál.
Rekorda katak antes ne’e Governu harii ona uma ba médiku Kubanu sira maibé ladún másimu iha teritóriu nasionál ho nune’e mak governasaun ne’ebé lideradu hosi Primeiru-Ministru Kay Rala Xanana Gusmão hakarak harii uma ba médiku hotu iha Timor-Leste laran tomak.
Aleinde ne’e, MS iha ona planu atu hasa’e mós kapasidade rekursu umanu tanba Governu rasik konsiente katak dezempregu iha setór saúde barak.
“Ida ne’e ita tenke haree hanesan forsa boot ida atu ita eleva duni hodi bele absolve iha merkadu rai laran, ida ne’e mak Governu haree hela oinsa mak atu investe”, nia konklui.
Jornalista: Hortencio Sanchez
Editór : Zezito Silva
