MS identifika ona hun hosi menus ai-moruk
DILI, 21 agostu 2023 (TATOLI) – Vise Ministru ba Operasionalizasaun Ospitál (VMOO) Flávio Brandão Mendes de Araujo, hatete iha ona identifikasaun ba kauza hosi stock out ka menus ai-moruk, tanba ne’e sei hadia sistema aprovizionamentu ministériu nian.
“Ita nafatin iha faze ida dehan stock out ka sei menus ai-moruk, ida ne’e tanba ita nia síkulu sistema aprovizionamentu, manán na’in hatama ai-moruk mai ita-nia armajenamentu ho tempu ida ne’ebé la serteja ba ita-nia nasaun, entaun ba oin ita buka meiu ida hadia iha sistema aprovizionamentu”, vise dehan ba Agência TATOLI iha edifísiu Ministériu Saúde Caicoli, ohin.
“Prosesu tenderizasaun ba sasan saúde nian ho karater ketak, ita labele kontinua, ita labele halo bebeik karater hanesan tinan sira liubá kotuk hodi hamosu problema barak iha Ministériu Saúde, ai-moruk stock out, la’os foin Governu ida ne’e de’it, Governu troka ba troka nafatin de’it, ida ne’e nia hun hosi prosesu aprovizionamentu ne’ebé nia karater ita jeneraliza hanesan ministériu seluk”, nia esplika.
Saúde tenke ho karater ketak no tratamentu espesiál iha ezekusaun Orsamentu Jerál Estadu (OJE) kada tinan atu rezolve problema ne’ebé Ministériu Saúde sempre hasoru kada tinan.
“Se ita mak la hetan ezekusaun espesiál ida iha saúde mak ita nafatin enfrenta difikuldade iha Ministériu Saúde kada tinan, ita bele iha osan maibé sasan ne’ebé mak ita iha depende ba kompaña sira hosi rai-liur hotu mak afeta makas ba servisu saúde nian”, nia revela.
Jornalista: Hortencio Sanchez
Editór : Zezito Silva
