MS planea halo mapeamentu mellora fasilidade saúde iha territóriu nasionál
DILI, 22 agostu 2023 (TATOLI) – Ministra Saúde (MS) Elia Amaral, dehan ministériu iha ona planu atu halo mapeamentu hodi mellora fasilidade saúde hotu iha teritóriu nasionál.
“Ami iha planu atu halo mapeamentu oinsa mak bele hasa’e fasilidade saúde sira liuliu ba ospitál referál no mós ospitál rejionál atu nune’e bele halo atendimentu ba parte tersiariu care no sekundáriu care nian”, Ministra Elia dehan ba jornalista sira iha Parlamentu Nasionál, ohin.
Nia dehan, mapeamentu ne’ebé sei halo foku liubá fasilidade tanba importante atu estabelese mákina fase-raan ba iha ospitál referál no rejionál atu atende pasiente sira ho di’ak.
Mákina fase-raan iha Hospital Nasionál Guidu Valadares (HNGV) hamutuk 20 mak halo atendimentu hela ba pasiente fase-raan.
Tanba ne’e, tuir planu Governu nian sei estabelese tan mákina fase-raan ba ospitál referál no rejionál sira iha teritóriu nasionál atu halo atendimentu ne’ebé adekuadu ba pasiente sira.
maibé mákina hira mak Governu atu apoiu ba ospitál referál no rejionál ne’e sei iha prosesu nia laran ho nune’e seidauk hatene mákina hira mak atu distribui.
Jornalista: Hortencio Sanchez
Editór : Zezito Silva
