MAP haruka joven 50 iha sábadu ne’e hodi tuir formasaun agrikula iha Israel
DILI, 31 agostu 2023 (TATOLI) – Iha sábadu semana ne’e, Ministériu Agrikultura Peska, Pekuaria no Floresta (MAPPF) haruka tán joven 50 bá tuir formasaun agrikula iha Israel.
Prosesu haruka joven nain-50 ba Israel ne’e nudar kooperasaun ne’ebé mak hosi parte Ministériu Agrikultura Peskas, Pekuaria no Floresta estabelese ho Governu Israel liuhosi nia Embaixada iha Sigapura iha tinan 2015.
Joven 50 ne’e sei ba tuir formasaun téknika agrikula avansadu durante fulan 11 iha Arava International Center of Agriculture Training ( AICAT) iha Israel.
Ho nune’e, IX Governu Konstitusionál mantein kooperasaun ida ne’e no iha tinan letivu 2023-2024 haruka tán joven 50 hodi ba tuir formasaun agrikula avansada ho objetivu atu bele kapasita joven sira, bainhira konklui sira nian formasaun bele implemta teoria no prátika ne’ebé sira bele ajuda hodi dezenvolve setór agrikultura iha Timor-Leste.
Diretór Nasionál Edukasaun no Formasaun Ministériu Agrikultura Peskas, Pekuaria no Floresta, Hipólito da Costa, hateten, liuhosi kooperasaun ne’ebé Ministériu Agrikultura ho Governu Israel halo, hahú hosi 2015-2022, Ministériu Agrikultura haruka ona joven 200 ba tuir formasaun AICAT iha Israel.
“Prosesu ida ne’e mak nia kontinuasaun to’o ohin loron iha Governu dasia, ita-nia Ministériu Agrikultura Peskas, Pekuaria no Floresta kontinua haruka ita-nia joven sira ba tuir formasaun agrikula avansada iha Israel”, Hipólito da Costa iha nia intervensaun serimónia despedida ba estudante AICAT 2023-2024 ne’ebé halao iha Salaun MAPPF Comoro, kinta ne’e.
Nia dehan, joven hamutuk 50 sei tuir fornasaun espesífiku iha área agrikultura, ortikultura, pekuaria no peskas avansadu.
Nia informa, ba formasaun AICAT ba tinan ne’e, iha ema barak mak aplika maibé selesiondu iha 5o no sira ne’ebé selesionadu ne’e maioria balun graduadu iha área agrikultura no eskola téknika vokasionál agrikula.
“Husu ba ita bo’ot sira atu nafatin hatudu vomtade no espiritu aprende hodi lori duni rezultadu ne’ebé di’ak”, nia dezafia.
Hipólito hateten, tuir lolos formsaun AICAT tinan ne’e, Isael hakarak aumenta kouta 100 maibé timoroan ne’ebé Governu haruka ba tuir formasaun AICAT ne’e balun sees tiha hosi lista no ba fali servisu iha Inglatera. Ho ida ne’e mak Governu Israel lakohi aumenta kouta ba Timor-Leste.
“Tanba ne’e husu ba ita bo’ot atu hatudu disiplina iha ema nia rai, tenke hatudu boa vontade no iha espiritu aprende atu labele taka fali oportunidade ba sira ne’ebé tuir mai”, nia enkoraja.
Iha fatin hanesan, Diretór Asuntu Bilaterál MNEK, Marcos da Costa dezafia joven 5o ne’ebé atu tuir formasaun agrikula avansada iha Israel tenke respeita ba ema nia norma sira iha rai Isael.
“Ita bo’ot sira aleinde ba aprende hanesan mós Embaixada Timor-Leste iha ema nia rai ne’ebé reprezenta ita-nia rai, tanba ne’e tenke hatudu disipliña iha ema nia rai hodi kumpre ema nia regra no norma sira”, nia hateten.
Marcos da Cruz, husu ba estudante AICAT ne’ebé sei aranka ba Israel atu hatudu vontade no iha duni espiritu aprende nun’e aproveita esperénsia iha formsaun atu fila karik bele aplika iha Timor-Leste.
“Alin sira, imi ba ne’e atu gaña esperénsia, bainhira fila atu ajuda hodi dezenvolve ita-nian setór agrikultura”, nia afirma.
Governante ne’e husu ba família joven 50 atu kontinua mantein komunikasaun ho oan sira, enkoraja sira atu halo sira-nia formasaun ho di’ak.
Estudante AICAT 2023-2024, Martinho Soares, komprete atu apreende ho fuan ho laran durante nian estadia iha Israel.
“Ami sei aprende ho fuan ho laran, kuandu ami fila ami sei implenta fali iha Timor-Leste saida mak ami durante ne’e apreende ona”, nia revela.
Joven 50 molok aranka ba Isael hodi tuir formasaun agrikula durante fulan 11 famíla hosi joven sira ne’e ho MAPPF asina deklasaun konkordánsia.
Serimónia asina deklasaun hetan partisipasaun hosi Sekretáriu Estadu Peskas, Sekretariu Estadu Pekuaria no inan aman.
Jornalista: Natalino Costa
Editór : Zezito Silva
