Ró ospitál Xina “Pace Ark” sei mai fó asisténtsia ba komunidade TL
DILI, 31 agostu 2023 (TATOLI) – Semana oin Ró Ospitál Xina “Peace Ark” sei mai Timor-Leste atu fo asisténsia espesializada ba populasaun ne’ebé sofre moras oioin, hahú hosi loron 03-10 setembru tinan ne’e.
“Ministériu Saúde hakarak informa ba públiku katak Ró Ospitál Xina sei mai vizita Timor-Leste, husi loron 03 to’o loron 10 setembru 2023, hodi fó asisténsia médika espesializada ba populasaun”, tenik iha komunikadu ne’ebé Agência TATOLI asesu hosi media Ministériu Saúde (MS), ohin.
Ho nune’e, Ministériu Saúde husu kolaborasaun atu halo markasaun konsulta sira hotu liuhosi Hospitál Nacional Guido Valadares (HNGV) no ekipa ne’ebé estabelese ona atu bele servisu hamutuk ho médiku Xina sira iha Portu Dili.
Oráriu atendimentu hosi Ekipa Médiku Ró Ospitál Xina nian maka tuir mai, iha loron 04-08 setembru 2023 atendimentu ba públiku parte dader, hahú tuku 08:00-11:30 no loraik tuku 13:00-17:30 otl.
Nune’e iha loron 05/09 Ekipa Médika Xina ida sei halo vizita no fó tratamentu iha Sentru Saúde Liquiça.
Iha loron 06/09 Ekipa Médika Xina sei halo visita no fó tratamentu iha Sentru Saúde Ataúro, iha loron 07/09 Ekipa Médika Xina sei halo visita no fó tratamentu ba F-FDTL no PNTL, loron 08/09 Ekipa Médika Xina sei halo vizita no fó tratamentu ba baze Naval Hera.
Jornalista: Hortencio Sanchez
Editór : Zezito Silva
