DILI, 05 setembru 2023 (TATOLI) – Estudante Lembaga Ketahanan Nasional (Lemhannas) Repúblika Indonézia halo estudu komparativu ida mai Timor-Leste hodi vizita Institutu Nasionál Defeza (IDN).
Estudu komparativu ne’e ho objetivu atu estudante Lemhannas ne’ebé kompostu hosi militár ho postu Brigadeiru Jenerál inklui Maijór Jenerál sira atu mai haree dezenvolvimentu instituisaun IDN, hahú hosi nia kriasaun 2010 ho nia atividade sira formasaun dezde 2012-2023.
“Vizita Institusionál Lemhannas mai iha IDN, vizita ida ne’e hanesan serimónia simu estudante militár sira ne’ebé mak balun fitun ida balun, fitun rua ne’ebé mak agora sira halo estudu iha Lemhannas. Sira mai iha ne’e atu hatene saida mak durante ne’e IDN halo”, Diretór Interinu IDN Guilherme Soares ba jornalista sira hafoin remata akompaña estudante Lemhannas ba iha IDN Palásiu Governu, tersa ne’e.
Tanba Institutu Defeza Nasionál no Lemhannas nudar institusaun rua ne’ebé mak servisu ho objetivu ida liuliu foku ba atividade hanesan iha área formasaun, area edukasaun, area peskiza, portantu ho ida ne’e mak estudante Lemhannas mai vizita atu hatene saida mak IDN halo durante ne’e.
“Ohin ita halo aprezentasaun kona-ba ita-nia IDN rasik hahú hosi nian kriasaun iha 2010 ho ninian operasionalilizasaun 2012 ho nia atividade formasaun sira ne’ebé hahú 2012-2023 portantu atividade ida ne’e mak ita atualiza ba sira”, nia dehan.
IDN sei fortalese kooperasaun ho Lemhannas iha área formasaun
Iha biban ne’e, Diretór Interino IDN Guilherme hateten, liuhosi estudu kooparativu ne’e, IDN kompromete katak sei haforsa kooperasaun hoLelmhannas liuliu iha área ensinu kurikulum nian.
Tanba IDN no Lemhannnas rasik antes ne’e iha ona área kooperasaun liuliu iha área Defeza no Seguransa ne’ebé mak fó formsaun ba ita nian militár sira liuliu Diretór IDN no Aktuál Ministru Defeza Donanciano Gomes nudar mós alumni Lemhannas iha 2014.
“Portantu instituisaun ida parseria antes ona, agora ita haforsa liután ba futuru”, nia hateten.
“IDN iha hanoin atu halo kurríukulu, troka kurrikulu, troka dosente oinsá ita mós bele konvida sira-nia dosente atu hanorin iha kursu ne’ebé mak IDN iha”, nia adianta.
Tuir Guilherme katak tanba IDN agora kursu haat ida mak kursu mastradu iha seguransa nian, ida mak kursu post graduasaun estudu estratéjiku, kursu post graduasaun estudu marítima no kursu ofisiál superiór.
Iha fatin hanesan, Gubernur Lembaga Ketahanan Nasional (Lemhannas) Repúblika Indonézia Andi Widjajanto, dehan prezensa estudante Lemhannas mai IDN ne’e ho objetivu atu haree dezenvolvimentu IDN.
Tanba IDN ne’e nudar mós instuisaun ida ne’ebé mak la’os fó formasaun iha área defeza, iha kestaun ida ne’e liuliu ba militár sira no seguransa nian maibé fó mós formasaun lideransa hosi nivél ema bo’ot hanesan ministru to’o iha Xefe Suku.
“Ida ne’e hatudu katak IDN iha progresu bo’ot iha ne’ebé hahú hatur nia-aan hodi foka ba dezenvolvimentu rekursu umanu oinsá prepara rekursu umanu ba Timor-Leste ida agora no ba futuru”, nia dehan.
Nia friza, iha Lemhanas foka ba iha estudu ekonómia verde (green economi), ekonómia matak (blue economi) dijitalizasaun, konstrusaun foun ba kapital nasaun ne’ebé agora dadaun la’o hela iha Indonézia ka Pembangunan Ibu Kota Negara (IKN) inklui demokrasia.
Jornalista: Natalino Costa
Editór : Zezito Silva
