Indonézia hakarak servisu hamutuk ho TL iha área ekonomia
DILI, 05 setembru 2023 (TATOLI) – Reprezentante hosi Lembaga Ketahanan Nasional Republika Indonesia (Lemhanas- RI), hasoru malu ho Prezidente Repúblika, José Ramos Horta atu ko’alia kona-ba kooperasaun servisu entre nasaun rua iha set+or ekonomia.
“Ami hosi Lembaga Ketahanan Nasional (Lemhanas-RI), ho partisipante edukasaun 20, sira iha militár hanesan fitun ida no fitun rua, entaun iha Governu sira hanesan eleisaun ida atu prepara hodi sai ulun-boot nasionál iha Indonézia iha tinan tolu to lima oin mai, ami-nia objetivu prinsipaál mak atu servisu hamutuk ho Timor-Leste iha setór ekonomia”, Governadór Lemhanas, Andi Wijajanto dehan ba jornalista sira iha Palásiu Prezidensiál Bairro-Pite, ohin.
Nia hatutan, vizita ida ne’e atu hala’o estudu komparativu, espesialmente kona-ba estratejia balun hanesan demokrasia, transformasaun dijitál, ekonomia modok no ekonomia azúl.
“Apresia Prezidente Ramos-Horta hamosu gambaran, nune’e Timor-Leste hala’o prosesu demokrasia, ne’ebé bazeia ba indise demokrasia iha mundu, Timor-Leste iha posisaun ida ne’ebé liu ba liberdade demokrasia iha Azía pasifiku,” nia dehan.
Aleinde ne’e, Lemhanas mós sei vizita ministériu balun no sei hasoru ho Ministru Defeza (MD), Ministru Komérsiu Indústria (MKI), atu Lemhanas bele hetan komprensaun di’ak liu kona-ba Timor-Leste.
“Antes ba ne’e, ami iha Lemhanas ho Prezidente Repúblika, iha momentu ne’e ho Xefe Governu Taur Matan Ruak, iha tinan kotuk ona halo inisiativa hodi hametin kooperativu ekonomia, espesialmente iha fronteira nian, ne’ebé bainhira tempu badak bele fó formasaun ba Rejiaun Indústria entre Indonézia ho Timor-Leste no iha futuru ne’ebé loke espasu ba komérsiu livre”, relata.
Rekorda katak akordu ne’ebé Governu Timor-Leste ho Indonézia asina iha fulan agostu-novembru 2022, bainhira vizita Taur Matan Ruak hosi Timor-Leste ba Indonézia iha fulan fevereiru 2023 kona-ba oinsa atu servisu hamutuk iha área ekonomia no seluk tan.
“Entaun ami mós husu ba Prezidente Repúblika atu kontinua haree fali akordu ne’ebé asina ona iha tinan sira ba kotuk atu bele fortifika kooperasaun teknolojia no ekonomia entre Indonézia ho Timor-Leste”, nia haktuir.
Xefe Estadu Ramos Horta mós konsidera servisu hamutuk entre nasaun rua importante tebes atu dezenvolve setór ekonomia.
“Kooperasaun Indonézia ho Timor-Leste sei bele kontinua servisu hamutuk la’ós de’it iha asaun, maibé iha objetivu di’ak liu tanba tanba ita bele akompaña hamutuk ho Primeiru-Ministru Kay Rala Xanana Gusmão to’o tinan 2025, liuhosi relasaun bilaterál ka kona-ba mekanizmu atu Timor-Leste bele tama ba ASEAN”, nia hakotu.
Jornalista: Hortencio Sanchez
Editór : Zezito Silva
