Prezidente Repúblika husu atleta Asian Games hatudu jogu ho umilde
DILI, 12 setembru 2023 (TATOLI) – Prezidente Repúblika José Ramos Horta husu ba atleta Asian Games hotu tenke mantein disiplina iha kompetisaun no hatudu jogu ho umildade.
“Lakon ka manán la’os kestaun, maibé ita-boot sira ba ne’e reprezenta nasaun, tenke hatudu jogu ho responsabilidade, dignidade no umildade”, Horta dehan bainhira despede ho atleta Asian Games iha Palásiu Prezidensiál Bairro Pite, tersa ne’e.
Atleta ne’ebé reprezenta Timor-Leste nu’udar diplomata profisionál hodi hatene hatur buat hotu tuir nia dalan.
“Imi ba hanesan diplomata, tenke hatur buat hotu tuir nia dalan, kumpre ba regulamentu hotu ne’ebé komisaun jogu sira fó sai”, nia dehan.
Iha sorin seluk, Ministru Juventude Desportu Arte no Kultura (MJDAK) Nélio Isaac Sarmento hatete, Timor-Leste partisipa kompetisaun Asian Games hamutuk dala haat bainhira restaura independénsia iha 2002.
“Tinan ida ne’e ita-nia delegasaun atu ba partisipa no kompete iha jogu ne’e hamutuk ema na’in 56, hosi númeru ne’e atleta hamutuk 26 feto ualu na’in 18 mane ho modalidade hamutuk 10”, Ministru Nélio afirma.
Iha fatin hanesan, atleta hosi modalidade Boxe Delio Mouzinho sente kontente tanba bele hetan tan konfiansa hosi federassun ba kompete iha eventu ne’e.
“Agradese bele hetan tan oportuniade ba kompete iha jogu ne’e, ha’u sei hatudu rezultadu tuir kbiit no kapasidade ne’ebé ha’u iha”, Delio dehan.
Ba eventu ne’e, Governu apoia orsamentu hamutuk rihun $400.
Tuir oráriu jogu ne’e sei hala’o iha nasaun Xina, hahú 23 setembru no remata iha 08 outubru.
Jornalista: Hortencio Sanchez
Editór : Zezito Silva
