BAUCAU, 20 setembru 2023 (TATOLI) – Autoridade Administrasaun Lautém propoin millaun $15-resin iha proposta Orsamentu Jerál Estadu (OJE) tinan fiskál 2024.
Sekretáriu Autoridade Administrasaun Munisípiu Lautém, jacinto da Costa, esplika, liuhosi Planu Asaun Anuál (PAA) deside propoin orsamentu inisiál millaun $31-resin, maibe hafoin reuniaun iha Konsellu Ministru aprova millaun $15-resin ne’ebé sei finansia saláriu no vensimentu, bens no servisu, kapitál menór no kapitál dezenvolvimentu.
“Hein katak proposta orsamentu ne’ebé ami hato’o ona bele hetan konsiderasaun hosi Governu no bele iha diskusaun di’ak hosi deputadu sira iha Parlamentu Nasionál tuir nesesidade komunidade Lautém,” Sekretáriu Administrasaun Lautém informa Agênsia TATOLI iha Vila Antiga, Baucau, kuarta ne’e.
Hosi proposta orsamentu ne’e inklui ona Programa Dezenvolvementu Integradu Munisipál hamutuk projetu 27 ne’ebé foka ba setór edukasaun hanesan aumenta sala uala, saúde mak konstrusaun sala observasaun no mortuuáriu, kanalizasaun bee-mos inklui konstrusaun edifísiu públiku ne’ebé hetan aprovasaun hosi reuniaun konsellu koordenasaun munisipál.
Munisípiu Lautém mós propoin liuhosi Fundu Infraestrutura ho monatnte millaun $11-resin atu reabilita estrada públiku kategoria urbana ho distánsia kilometru ualu iha Lautém Vila inklui normaliza estrada rurál no konstrusaun ponte hamutuk rua.
“Projetu sira-ne’ebé prevee iha proposta orsamentu ne’e nesesidade urjénsia hanesan mortuuáriu tanba bainhira komunidade balun mate presiza fatin atu utiliza antes transporta ba família,” Jacinto da Costa akresenta.
Iha tinan-2024, autoridade Lautém sei halo rekrutamentu ba funsionáriu kargu diretór serbisu munisipál hamutuk na’in-rua hanesan diretór dezastre naturál no seguransa alimentár hodi prienxe estrutura administrasaun relasiona ho planu governu atu implementa lei podér lokál no desentralizasaun administrativa.
Munisípiu Lautém iha postu administrativu lima komposta hosi Lautém, Iliomar, Lospalos, Luro no Tutuala ho totál populasaun hamutuk 59.787.
Jornalista : Natalino Belo
Editór : Evaristo Soares Martins
