Assanami ho BRI diskute asuntu Bankaria iha TL
DILI, 22 setembru 2023 (TATOLI) – Vice-Primeiru Ministru, Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária Mariano Assanami Sabino, hasoru malu ho ekipa Banku Rakyat Indonesia (BRI), hodi diskute asuntu bankaria iha Timor-Leste.
Ekipa BRI ne’ebé lidera hosi Jenerál Manajer iha Timor-Leste, Roby F. Satraamadja, sente kontente tanba bele hasoru malu ho Vise-Primeiru Ministru hodi diskute asuntu sira ne’ebé presiza servisu hamutuk hodi apoiu povu Timor-Leste tuir planu no programa Governu nian.
“Ami-nia esperansa, ba oin ami bele apoiu programa Governu Timor-Leste nian, ba setór públiku no privadu liuliu iha área bankáriu nian”, Jeneral Manajer dehan iha Palásiu Governu, ohin.
Jenerál Manajer akresenta katak Assanami ho vontade tomak simu ideia sira ne’ebé hato’o hosi parte BRI nian, tanba ne’e ba oin BRI hakarak koopera di’ak ho Governu Timor-Leste hodi ajuda Timor-Leste nia dezenvolvimentu ba oin bainhira tama ba membru permanente ASEAN.
Jornalista: Hortencio Sanchez
Editór : Zezito Silva
